Лимон емиси С витамининге бай. Бир лимонда 31 мг аскорбиновый кислота болады. Оннан оьзгелей, бу емисте фолиевая кислота, витамин Д, токоферол, тиамин, ретинол, пиридоксин, рибофлавин бар. Лимон иммунитетти беркитпеге ярдам этеди. Онынъ согы аьдемнинъ шаркын токсинлерден тазалайды. Сувга лимон салып ишкен аьдем, азбага болады деп те айтылады. Сонынъ уьшин кеште бир аяк кайнаган сувга эки кишкей касык куры ромашка шешекейи мен бир неше кесек лимон таслап, эртен ишпеге керек. Аьлимлердинъ коьбиси лимонлар аьдемнинъ буьйрегин таслар болувдан саклайды деп санайдылар. Тергевлердинъ сырагыларына коьре, цитруслы емислер, солардынъ санында лимон кулланув аьдемди авыр мараздан саклайды. Тагы да лимон хатынларга шашларын эм тырнакларын беркитпеге ярдам этеди. Белгиленген емислердинъ кабыгы да пайдалы, оны тасламай кулланмага тийисли.
Лимоннынъ пайдасы ман бирге зарары да болмага болады. Аллергиясы болган, асказаны, шеги авырыган аьдемлерге емисти сак болып кулланув керек.
Аьлиги заман туькенлерде туьрли коьркли лимонлар коьремиз. Биревлери – оьзлери айлак уьйкен тувыл эм кабыклары да юка, ама авыр. Баскалары – уьйкен, кабыклары калын эм енъил тартадылар. Юка кабыклы лимонлар алса ийги, деген маслагатлар этилинеди.
Н.Кожаева аьзирлеген.