Курск каласынынъ касында 80 йыл артта бизим атайларымыз – совет аьскершилери генераллар Рокоссовский, Ватутин эм Коневтинъ етекшилеви астыда, соьзлер мен белгиленип болмаган куьшлер салып, нацистлер армияларын енъгенлер. Мине мунда Уллы Аталык согысынынъ тамамлары белгили болган. Озган йыл болса, сол ерлерде сондай немецлердинъ крестли танклары ман, неонацистлер СВО барысын туьрлендирмеге болган, уьйкен, баскыншылык операция озгармага суьйгенлер эм бу ерлерди баскаларына авыстырмага мырат эткенлер. Бизим аьскершилер эм офицерлер, «Поток» операциясынынъ данъклы катнасувшылары олардынъ эсине атайларымыз коьп йыллар артта оккупантларга берген дерислерди салдылар. Баслап бек кыйын эди: душпан меканларды бузды, аьдемлерди оьлтирди, яшавшыларды эзиетледи, оларды
Украина ерине аькеттилер, бизим аьдемлерге коьмек эм коршалав керек болды. Сол
баьри болган ислерге бизим эр кисилер шеттен карап, телевизордан эм баска билдируьв булаклардан янъылыклар ман рахатлы танысып турып болмадылар. Эр
кисилеримиз сол ерлерде болып, аьдемлерди эм бизим япсарларды коршаламага,
еримизди явдан босатпага суьйдилер. Уллы Элимиздинъ яшавшылары, сонынъ
сырасында бизим ердеслер де, РФ Коршалав министерствосы ман контрактлар туьзип, Курск областин явдан босатпага асыктылар. Олардынъ арасында Карагас авыл
яшавшысы Альберт Бесленеев те бар. СВО озып турган ерге оьзимиздикилерге ол
согыс спецоперациясы басланган биринши айлардан алып бармага суьйген. Эр киси узын кешелерде Тувган ери, халкы алдында борышы акында коьп ойлаган. Тек онынъ СВО-га кетуьви анасын кыйнар деген ой Альбертке тынышлык бермеген. Курск областининъ япсарын оьткен яв, бизим ердесимизде калган шыдамлыктынъ бир ялгыз тамшысын курытты. Эндиги ол нацизм мен куьресуьвде оьз уьлисин коспага тийисли деген ойында каты токтады. Соьйтип нацизмди енъмеге коьп йыллар артта онынъ атайлары – Уллы Аталык согысынынъ катнасувшылары Алимхан Бесленеев,
Мунъболат Нургишиев куьшлерин аямаганлар, а Ярик Эрежепов болса, янын да берген.
СВО озып турган ерге Альберт Бесленеев озган 2024-нши йылдынъ октябрь айында, Россия Федерациясынынъ Коршалав министерствосы ман контракт туьзетип, Каспий флотилиясынынъ тенъиз пехотасынынъ 177 гвардия полкынынъ сырасында, кеткен. Баслап оларды Донецк Халк Республикасына элтеп таслаганлар. Мунда инструкторлар йигитлерди яв ман куьресуьв тактикасына, яраланганларды эм каты яралыларды дав майданлардан шыгарып уьйреткенлер. Альберт Бесленеевти куьп командири этип сайлаганлар. Январь айында болса оны согыс йолдаслары ман бирге Курск областине аькетедилер. Бир кесек заманнан сонъ, увылын коьрмеге Курск областине анасы Альмира Бесленеева да барады. Онда ана юрегининъ йылувлыгын, суьйимин эм каьр шегуьвин ол тек оьзининъ увылына тувыл, онынъ касындагы йолдасларына да аямай савкатлайды.
Эрлик ордени мен, «За отвагу», «За ратную доблесть» медальлери мен савгаланган,
Россия элимизди куьшли суьйген эм онынъ уьшин яс янын аямаган СВО катнасувшысы, офицер Ренат Елманбетов айткан эди, эр кисидинъ эрлерге келисли касиетлери боьтен де дав майданда ашыладылар, тынышлы яшавда оьзлерининъ йигерлигин коьрсетпеген аьдемлер, элимизге кыйынлы заманларда эрликтинъ уьлгисин коьрсетедилер, соьйтип куьндегилик яшавда оьзининъ акында айттырмаган аьдемлер баьтирлерге айланадылар. Альберт данъ эм баьтирлик акында ойламаган, ама элине кыйын заманда оны коршалавга каты турган йигитлер сырасыннан. Ердесимиз дав майданда коркынышсызлык эм йигитлик коьрсетеди, оьз яшавын сынавга салып каты яраланган согыс йолдасларын, олардынъ кевделерин
алдышылыктан шыгарады. Ол авыр яраланган командирин де куткарган заман болган.
Баслапкы куьнлер, оьз Элине пайда аькелемен деген ойлар ман канатланган Альберт, коркувдынъ, кавыфлыктынъ эм явдынъ дронлары акында муткан, сонъ аста-аста ога аьдемге келисли сезимлер кайтып баслаган. Бизим ердесимиз эки кере яраланган, экинши ярасы бек авыр болган, бир куьлле аьли де онынъ шаркыннан шыгарылмаган. Олай болса да, Альберт Бесленеев СВО сыраларына тагы да кайтып, нацизм мен куьресуьвди бардырады. Оны ман авылдаслар, ердеслер оьктемсийдилер эм Енъуьв мен кайтканын куьтедилер.
Нурият Кожаева,
РФ Журналистлер Союзынынъ агзасы.
Суьвретте: А.Бесленеев (биринши) оьз аьскер йолдаслары ман.