Тувган тиллердинъ байлык асабалыгын саклавга каратылып, тамбыз айынынъ 4-7-нши
куьнлеринде элимиздинъ бас каласы Москвадынъ Кызыл майданында Россия халкларынынъ адабиятларынынъ он биринши фестивали озды. Мунда йолыгысларды «Дослар тв » интернет телеканалынынъ уйгынлавшысы эм етекшиси Даниял Исакаев юритти.
Фестивальде Россиядынъ эллиден артык регионларыннан 400-ден артык китап баспа-
лары оьзлерининъ китап продукцияларыннан эстеликли выставка-ярмалыгын уйгынлап коьрсеттилер.
Россия оьлшеминде оьткен халклар ара адабиятлар фестивалинде белгили аьлим,
тарих илмилерининъ кандидаты, Карашай-Шеркеш илми тергев институтынынъ алдышы илми куллыкшысы Заида Зинеева эм шаир, Россия Журналистлер эм Язувшылар союзларынынъ агзасы, «Маьметекей» республикалык адабият-суьвретлев журналынынъ бас редакторы, «Карашай-Шеркеш» ГТРК телеканалынынъ ногай боьлигининъ хабаршысы Асан Найманов катнастылар. Зейинли аьлим Заида Зинеева спикер эсабында бек кызыклы йолыгыста ортакшылык этти. Заида Залимхан кызы Москвадынъ «Илми» («Наука») бас китап баспасында шыккан «Ногайлар» деп аталган китаптинъ презентациясын озгарды. Онынъ барысында китапке кирген терен маьнели илми куллыклар, ногай тилин, саниятын, адабиятын оьрлендируьвге уьйкен косымларын эткен эм энди де киргистетаган халкымыздынъ зейинли аьдемлери
акында кызыклы хабарлады. Фестивальдинъ ашылувында спикер эсабында балалар уьшин шыгатаган «Маьметекей» республикалык адабият-суьвретлев журналынынъ бас редакторы Асан Найманов ата-бабаларымыздан калган, орта оьмирлерден алып бизим заманларга дейим еткен тил байлыгымызды саклав эм оьрлендируьв бойынша
этилетаган куллык акында толы хабарлады. Сол мырадта ана тилинде шыгатаган «Ногай давысы», «Шоьл тавысы» газеталарынынъ, «Маьметекей», «Лашын», «Байтерек», «Саьвле» журналларынынъ бардыратаган аьрекети акында айтты. Энъ де кызыклы соравларды берген йолыгыстынъ катнасувшыларына баспа амаллардынъ логотиплери салынган савгалары да тапшырылды. Йолыгысты Даниял Исакаев юритти. Сонъында Даниял Шабатыр увылы спикер эсабында катнасувшыларына, сонынъ сырасында Асан Наймановка да сый дипломларын тапшырды. Асан Аждаутович Миллет адабиятлар фестивалинде катнасувга ярдам эткен аьдемлерге, айтпага, тарих илмилерининъ кандидаты Заида Зинеевага, «Дослар тв » интернет-
телеканалынынъ уйгынлавшысы эм етекшиси Даниял Исакаевке, Карашай-Шеркеш Республикасынынъ Халк Йыйынынынъ депутаты Заур Наймановка, «Ногай ямагаты» организациясынынъ етекшиси Рашид Акказиевке, солай болып, Эльдар Калмыкаевке, Азиз Аджиманбетовка, Назимбий Бирабасовка, Аскер Коккозовка, Светлана Самдиновага, Беккуват Болатовка, Артур Савруевке, Мустафа Кадракаевке уьйкен разылыгын билдиреди.
Суьвретте: фестиваль катнасувшылары.