22-нши июнь элимиздинъ тарихине онынъ энъ де кайгылы бетлери басланган куьн болып дайымларга кирген. Бу куьн миллионлаган аьдемлер яшавын аькеткен, аьр бир аьелдинъ бактысында яра эм орын калдырган Уллы Аталык согысы басланган. Неше йыллар оьтсе де, биз дав майданларда ян берген йигитлерди, оьз яшавларын сынавга салып, сол кыйынлы йылларда Аталыгын коршалаганларды, ашлыктан,
фашистлердинъ зорлыгыннан ян берген яшавшыларды эсимизде саклаймыз.
Бизим наьсипли яшавымыз уьшин оьзлерин аямаган ветеранларга сыйоьрметти яс несилде тербиялав ниетте, Орталык китапханасынынъ куллыкшылары «Минувших дней святая память» деп аталган билдируьв саьатин озгардылар. Мунда Уллы Аталык согысынынъ яс баьтирлери Марат Казей эм Юля Портная акында видеофильм
коьрсетилинди. Балалар китапханасында «И помнить страшно, и забыть нельзя» деп
аталган эстелик саьати уйгынланды. Шара 1941-нши йылдынъ 22-нши июнинде Уллы Аталык согысы басланганы акында Юрий Левитан совет халкына билдирген видеозаписьти коьрсетуьвден басланды. Йолыгыс барысында согыс йыллар балалар уьйкенлер мен бирге тылда куллык эткени, олардынъ партизан отрядлары сырасында
коьрсеткен коркынышсызлыгы акында айтылды.
Эстелик эм кайгырув куьнине багысланып патриотлык шаралар авыл китапханаларында да оздылар. Сондай шараларда катнасув – уллы тарихтинъ бир кезеги этип оьзин сезуьв. Баьтирлер акында эсти биз эсимизде сакламага эм несилден-несиллерге коьширмеге тийислимиз.
Н.Кожаева.
Суьвретте: шарадан коьринис.