Ногай район орталыгы Терекли-Мектеб авылында йыл сайын мундагы кайбир объектлерге
капиталлык ярастырув ислери эм янъы курылыслар юритилип турадылар. Быйыл парк ишиндеги алдынгы волейбол майданы орынына янъысы, заманга келисли майдан курылып туры. Курылыс Дагестан Республикасынынъ Курылыс, архитектура эм ЖКХ министерствосынынъ линиясы бойынша юритиледи.
– Курылып турган майданнынъ оьлшеми – узынлыгы 30 метр эм кенълиги 15 метр. Бу ерге бетон куйылып, оннан сонъ уьстине айырым калше тоьселеек. Майданнынъ шетлерине каравшылар эм ян авырувшылар уьшин олтыргышлар салынаяк. Волейбол майданынынъ тоьгерек ягына тротуар сокпаклары тоьселип, кыр бетиннен кораланаяк, – дейди Терекли-Мектеб авыл аькимбасы Марат Кулунчаков. Янъы волейбол майданынынъ курылысы быйыл 1-нши сентябрьге кутылмага каралады.
Элбетте, сондай майданнынъ кулланувга берилуьви, бир соьзсиз де, авыл яшавшылары арасында спортты таралтувга уьйкен косым болаяк.