Наьсипли инсан оьзи наьсибин, бактысын кеплейди. Соьйтип биз айтамыз, болса да бизди наьсипли этедилер тоьгеректеги аьдемлер. Сени аявлап оьстирген ата-ананъ, суьйикли исинъ, сени анълайтаган ян йолдасынъ, саьбийлеринъ – сол инсаннынъ уллы наьсиби.
Мурзабий Курманбай увылы Елманбетовтынъ акында язбага керек деп айтканда, ойладым, ол – кызыклы, кыйынлы эм наьсипли бактыдынъ иеси. Наьсип тувыл ма – аьлейи Сакинат Магомет кызы ман сылув айдай кызлар оьстирдилер, олар эгиз – Тамара эм Гульнара. Кызыклы ша аьелде эгизлер
тувган. Эки балады бирден оьстируьвге де кыйын салув керек, болса да, кызлар
билимли эм куллыксуьер болып оьстилер. Экеви де врач кесписин сайладылар, буьгуьнлерде мине деген медицина куллыкшылары болып, куллыгын бардырадылар. Ногайымыздынъ атын айттырган эм данъклаган кызлар ислеген сый-абырай казанганлар. Буьгуьнлерде Мурзабий Курманбай увылы эм Сакинат Магомет кызы йиенлерге куьезленип яшайдылар. Сонда – наьсип.
Мурзабий Елманбетовтынъ бактысы кыйынлы деп айтувымнынъ да маьнеси бар. Онынъ яслыгы афган согысынынъ йылларына келди. Сол согыста бизим районымыздынъ яслары катнасканлар. Меним макалымнынъ геройы Афганистан еринде эки йылдан артык болган. Оьз эр борышын толтырмага
Мурзабий Елманбетов 1983-нши йылда кеткен. Афган согысы акында коьп окыганман, бир кере коьзиме он йылдынъ аьр бир йылында неше аьдем оьлгени саналган деген билдируьв туьсти. 1983-нши йыл Афганистан еринде 2343 инсанлар янларын бергенлер. Сол кыйынлы йыл Мурзабий ердесимизге
де согыспага туьсти.
– Биринши куьнлерде биз Кушка деген калага келдик, бу Кызыл Байраклы туркестан согыс округы эди. Мунда биз 2 ай турдык, сонъ ярым йыл Ташкент каласында уьйренуьвлер оьттик. Сонъында – Афганистан. Кушка каласында бизди курылыс сулыбына да уьйреттилер. Бизим батальонымыздынъ борышы – блокпостларды, казармаларды, согыс складларды курув. Биз Тургун провинциясына келдик, тоьгеректе – тавлар, бизге баьри зат та туьрли болып коьринетаган эди, шоьлде тувып-оьстик ше. Солай ок биз азыктуьлик, савыт-садак, бензин, дарманлар керекли ерлерге элтейтаган эдик,
– деп эскереди Кумлы авылдынъ яшавшысы.
Ол коьп хабарламайды согыс акында. Болса да, бир эскеруьвин окувшыга
айтайым.
– Меним эсимде Афганистанда
карсы алган 9-ншы Май куьни. Бизим аьскерлер боьлигимиз янында бийиклик бар эди. Сонда турган моджахедлер бизди атпага беспилотниклер йиберген эдилер. Баьри затлар да янды
сол куьн – кийимлер, уьйге кайтпага аьзирлеген альбомлар. Аьдемлер коьп оьлдилер. Мен сол куьн аман калдым. Биз караша айында кайтпага керек эдик, тек увыт айга дейим калдык.
Сога себеп – бизди авыстырмага керек аьскершилерди аькелеяткан самолетты явлар атканлар. Баскаларды уьйретпеге заман керек эди, сога коьре, кеш калдык. Коьп кере «кара тюльпанлар»
ясларды уьйге аькеттилер, солардынъ арасында меним досларым да бар эди,
– деп эскереди ол.
Аьскерши-интернационалист коьплеген медальлер мен, баргылар ман савгаланган. Сол йыллар ердесимиздинъ эсинде дайымларга калган. Авылга кайтып келип, Мурзабий Курманбай
увылы тынышлы яшав ман яшайды. Буьгуьнлерде ол – сенимли ян йолдас, суьйикли ата, йиенлерин эркелетип койган нагашатай. Йиенлери Кадрия, Мансур, Низам, Билал, Абдурахман яй
тыншаювларда нагашатайды эм энейди келип суьйинтедилер.
– Биз бирге яшаганлы тезден 40 йыл толады. Сол йыллардынъ ишинде аьелимиздеги тил бирлик, бирбиримизди коршалав, уьстинликлерге суьйинуьв, саьбийлеримизге, йиенлеримизге таьвесилмес суьйим уллы наьсипке айланды. Ян йолдасым Мурзабий – бек оьзден аьдем. Аьлиги заманда тийисли тыншаювда. Бос заманын йиенлерине береди, – деп хабарлайды Сакинат Магомет кызы Елманбетова. Онынъ куллыгы тыныш тувыл,
савлай авылды басшылав – бек яваплы ис. Болса да, онынъ тиреви, коьплеген
йыллар бирге яшав йоллары ман келген ян йолдасы аьр дайымда янында.
Озган йыл Елманбетовлардынъ аьели бирге татымлыкта коьплеген йыллар яшаганы уьшин, билимли аьвлетлерди оьстиргени уьшин «Суьйим эм алаллык уьшин» деген медаль мен савгаланганлар. Сол да – инсаннынъ уллы наьсиби.
Буьгуьнлерде Елманбетовлардынъ аьелинде шатлык – аьелдинъ басы Мурзабий Курманбай увылы оьзининъ 60 ясын карсы алады. Сол куьн кашан да, кушагына алар оны ювыклары, энъ
де суьйикли инсанлары. Биз де ердесимизге ден савлык, аьли де узак оьмир сагынамыз. Оьзден инсаннынъ уллы наьсиби таьвесилмесин.
Гульфира Бекмуратова,
Россия Язувшылар союзынынъ агзасы.
Суьвретте: Мурзабий эм Сакинат
Елманбетовлар
Оьзден инсаннынъ уллы наьсиби
