1-нши сентябрь Билимлер куьнинде Ногай районынынъ Батыр-Мурза авылында шатлыклы байрам аьлинде авыл орта мектебининъ янъы меканы кулланувга берилди. Сол ок куьн мунда мектеб тамында сонынъ выпускниги, согыс спецоперациясында катнасып йигитлерше янын берген Шамиль Менлигазиевтинъ эстелик белгиси де ашылды. Бу куьннен алып мектеб онынъ атын юритип баслады.
Шарады ашаятып, соны юритуьвшилер бу куванышлы куьнди окувшылар, окытувшылар эм
авыл яшавшылары коьптен бери куьткенлерин, неге десе мектебтинъ эски меканы 1927-нши йылда ашылган болган эм ол аьлиги заман талаплавларына келиспейтаганы акында айттылар.
Йыйылганларга каратылган саламлав соьзи мен Ногай район администрациясынынъ аькимбасы Джамалутдин Эсиргепов шыгып соьйледи. Ол баьрисин де бу эстеликли куьн мен кутлады эм мектебтинъ 100 окувшы орынлы янъы меканы «Образование» миллет
проекти бойынша 2021-нши йылда курылып баслаганын белгиледи. «Биз буьгуьн кулланувга берип турган мектебимиз – ол, бир соьзсиз де, Дагестан Аькимбасы Сергей Меликовтынъ юритип турган социаллык политикасынынъ бир шайыты. Элимиздинъ эм республикамыздынъ етекшилери социаллык маьнелиги болган объектлерди курувга бас маьне бередилер. Янъы заманга келисли мектеб меканынынъ ашылувы – авыл яшавында маьнели оьзгерис. Мектеб азбарында физкультура эм спорт пан каьрлемеге деп баьри шартлар да туьзилгенлер. Быйыл мунда 111 окувшы билим алаяк, олардынъ 7-ви – биринши кере – 1-нши класста», – деди ол.
Шарада кутлав соьзи мен ДР Авыл хозяйство эм азык-туьлик министри Зураб Куччаев те йылы соьзлерин айтты. Министр мектебке элимиздинъ эркинлиги эм бойсынмаслыгы уьшин янын берген баьтирдинъ аты берилгенин айырым белгиледи. «Буьгуьнги
яслар, биз баьримиз де бу тарихимизди бир де мутпага керек тувылмыз», – деди ол. Зураб Куччаев бу ерде Шамиль Менлигазиевтинъ анасын ортага шакырды эм онынъ
увылындай яслардынъ аркасы ман сав Россия аман турган, турады эм тураяк деп белгиледи. «Биз оларь ман оьктемсиймиз! Оькинишке, буьгуьн сизге разылык соьзлерден
баскалай айткандай зат йок… Ама сизинъ увылынъыз Шамильдинъ аты оьмирлерге эстеликке айланган!», – деди министр эм онынъ анасы Медина Муталимовага ДР
Аькимбасы атыннан савга – ноутбук тапшырды. ДР Халк Йыйынынынъ депутаты, КПРФ рескомынынъ секретари Мурзадин Авезов йыйылган ямагатты республика парламенти атыннан кутлады. Онынъ айтувы ман, биз баьримиз де бу мектеб меканы ашылувын коьп куьттик эм сога уьйкен шатлык пан етистик.
Шатлыклы митингте кутлав соьзлери мен солай ок мектеб директоры Айгуль Менласанова,
«сельсовет Коктюбинский» МО СП аькимбасы Замир Суюндиков эм баскалар. Муннан сонъ Батыр-Мурза мектебине баьтирлерше янын берген, СВО катнасувшысы Шамиль
Менлигазиевтинъ атын беруьв акында эстеликли белгиди ашувга ыхтыяр онынъ анасына, мектеб окытувшысы Медина Муталимовага берилди. Бу кыска болса да, коьнъилди кайгылы ойга толтырган, юрекке тийген такыйка эди. Коьплер коьз ясларын ясырып болмадылар эм тувган Аталыгымыз уьшин дав кырларында ян берген баьри ясларымызды эслерине алдылар.
Шарадынъ ызында БатырМурза авыл мектебин окып кутарган, Россия Президенти Владимир Путинге авылда янъы мектеб меканы курылмага кереги акында хат язган А.Бибулатовага соьз берилди. Эски ийги мектеб аьдети мен дериске биринши занъды согув
ыхтыяры 1-нши класс окувшысы Замира Койлакаева ман 11-нши класс окувшысы Арина Шандиевага тапшырылды. Муннан сонъ шарадынъ энъ де куванышлы аьдети оьткерилди: мекан капысы алдындагы кызыл лентады шатлыклы кепте ДР Авыл хозяйство эм азыктуьлик министри Зураб Куччаев, Ногай район басшысы Джамалутдин Эсиргепов, мектеб директоры Айгуль Менласанова кестилер. Соны ман йыйылган ямагат эм сыйлы конаклар мекан ишине кирдилер. Мунда айырым окув кабинетинде олар Дагестан Аькимбасы Сергей Меликов юриткен республикадынъ авыл-калаларында Билимлер куьни мен байланыслы ВКС-те катнастылар.
М-А.Ханов.
