Кайсы заманларда да аьдемлер Аталыгы ман оьктемсип, оны оьрметлеп, душпаннан коршалап келгенлер. Дайым да йигерлик, патриотизм, элине бир иркуьвсиз кызмет этуьв – халкымыздынъ
бас баалыклары болган эм аьли де болып келедилер.
Биз Элимиздинъ бойсынмаслыгын коршалап келетаган баьтирлеримиздинъ йигитликлерин дайым эсимизде саклаймыз. Буьгуьнлерде олар алдышылыкта, оьз яс янларын аямай, неонацизмнен элимиздинъ ярык келеектегиси, аьдиллик уьшин йигитлерше куьресип келедилер. Олардынъ аьр бириси бизге йигитликтинъ эм коркынышсызлыктынъ коьримли уьлгиси болады. Элине авыр заманларда оны коршалавга турув – ол аьр бир эр аьдемнинъ киели борышы. Алдышылыкта болган ердеслеримизди биз атлы-атлары ман билмеге тийислимиз. Яс несиллеримиз, онйыллыклар
оьтсе де, бизим заманнынъ баьтирлери акында дайымга эслеринде тутаяклар. Олар бизим савлайымызга да, Украина еринде юрген согыс спецоперациядынъ маьнели борышларын толтырып, Аталыгынынъ бойсынмаслыгын коршалап, йигитлик коьрсетип келуьвлери мен йогары йигитликтинъ, коркынышсызлыктынъ уьлгиси болып калаяклар. Янъыларда Россия Федерациядынъ
Президенти В.Путиннинъ буйрыгы бойынша Карашай-Шеркеш Республикасынынъ Ногай районынынъ Эркен-Халк авылыннан СВО катнасувшысы Шамиль Баширович Калмыкаев II дережели «За отвагу» патшалык савгасына тийисли этилди.
Савга согыс урысларында коьрсеткен йигитлиги, Аталыгын, Россиядынъ патшалык кызыксынувларын коршалавда коьрсеткен йигерлиги, йигитлиги уьшин тапшырылган. Согыс спецоперация юрген ерде Шамиль Калмыкаев оьзин коркынышсыз, уста аьскерши, алал, сенимли йолдас этип коьрсетти. Аьскершилик борышына алаллыгы уьшин ол баска савгалары ман да, айтпага, «За отвагу медали мен эм «Гвардия» белгиси мен де белгиленген.
Коьптен сакланган енъуьв алдышылыкта шынты йигитлеримиздинъ эм сенимли тыл ярдамы ман ювыклатылады. Биз де Шамиль Башировичке уьйине, аьелине коьптен сакланган енъуьв мен
аман-эсен кайтканын йораймыз. Биз сондай йигитлеримиз бен оьктемсиймиз.
Бизим хабаршы.
Суьвретте: Шамиль Калмыкаев