Халкымыздынъ оьнерли эм алал увылы КЧР ат казанган маданият куллыкшысы, композитор, йырлавшы Расул Муссович Сеитовка бу йылдынъ кырк кийик айынынъ 8-нши куьнинде 50 яс толаяк эди. 2014-нши йылдынъ тамбыз айынынъ 6-ншы куьнинде яшавынынъ 39-ншы йылында Расул Сеитов анъсыздан кателенип дуныядан кешти. Оьзининъ оьнерин, айындырык ярыгындай кыска, ама яркын яшав оьмирин суьйикли эм аьзиз халкына, ногай адабиятына
багыслап келди. Расул, яшав оьмири кыска болаягын сезгендей, коьп куллыкларын шалт этпеге шалысты, ол тоьгеректегилерге оьз йылувлыгын, нурын аямай сеппеге асыгып, тез янып соьнди. Мага Расул Муссович Сеитовтынъ аты, тап меним студент йылларымнынъ басыннан, айтпага, Карачаевск каласындагы педагогикалык университетинде окыган 1992-нши – 1993- нши йыллардан алып таныс.
Сол йылларда Расул Сеитов та сол ок окув ошагында анъ боьлигинде билим алмага туьскен эди. Онынъ йырлав оьнери бары студентлер арасында тез яйылды. Мен де онынъ оьнерине, аьлемет тавысына бет берип караган коьплеген тынълавшыларынынъ бириси болдым. Окувдан бос заманларда, биз, ногай миллетли студентлер, кызлар, яслар, общежитиеде йыйналып, келеекте белгили композитор, йырлавшы болаяк Расулдынъ колындагы гитара саз алаты ман оьзи язган йырларын, йогары сезим мен йырлаганын, коьп кере эситип сукланганмыз.
Оьзи кешелерде язган йырларын йырлап тоьгеректегилер мен боьлисуьви, анъ боьлигинде билим алып, кеспилик ягыннан оьсуьви ногай ястынъ баслаган кишкей сокпагын уьйкен оьнершилик йолына айландырды. Оьнерли композитордынъ ногай адабиятына косымы баасыз. Ол оьзиннен сонъ халк арасында канатлы йырларга айланган коьплеген ятлавларын да калдырып уьлгирди. Расулдынъ йырларын тынълаганда, халкымыздынъ бай аьвелгисинде кезинип, сол
заманды коьз алдынъа аян аькелесинъ. Онынъ сав яшавынынъ маьнеси – оьз оьнери мен халкынынъ атын оьрметлеп, оьрге коьтеруьв, халкына алал болув эди.
Оьнерли яс 1996-ншы йыл туьзилген «Маьметекей» вокал-хореографиялык коллективине яшав оьмирининъ 20 йылларын багыслап келди. Соннан алып «Маьметекей» халк вокал-хореографиялык ансамбли оьз атын тийисли юритип, тек КарашайШеркеш Республикасында тувыл, онынъ тысында да белгили болып келеди.
Ол коьплеген яс оьнерлерге, оьз канатларын беркитип, оьспеге амал берген аьдемлердинъ де бириси эди. Буьгуьнлерде сол «Маьметекей» халк вокал хореографиялык ансамбли Карашай-Шеркеш Республикасынынъ ат казанган маданият куллыкшысы Расул Сеитовтынъ атын
художестволык етекшиси
Ирина Сеитовадынъ басшылавы ман етимисли юритип, туьрли конкурсларда, фестивальлерде, шараларда катнасып, енъуьвши, баргылы орынларынынъ иеси болып келеди.
Бийикликке коьтерилип келген халк юлдызынынъ оьмири кыска болды. Онынъ алдына салынган мыратлары, яратувшылык ойлары, баславлары коьп эдилер. Онынъ коьп мыратлары яшавга шыгарылмай кайырылдылар, коьплеген ятлавлары, йырлары язылмай калдылар. Буьгуьнлерде онынъ тувган Икон-Халк авыл
маданият уьйи оьнерли Расул Муссовичтинъ атын тийисли юритип келеди. Онынъ акында «Мастера искусств Карачаево-Черкесии» деген макала Байрамуков атындагы Карашай-Шеркеш Республика бойынша Миллет китапханасынынъ боьлиги мен аьзирленген китабинде де орын тапкан.
Расул Сеитовтынъ атын онынъ йырлары халкымыз арасында биревден баскага коьшип, йырланып, онынъ етекшилиги мен туьзилген «Маьметекей» вокал-биюв ансамбли оьз оьнерин халк арасында яйылдырып келген сайын, Расулдынъ акында эстелик халк эсинде оьмирге яшаягына шек йок.
Г.Нурдинова.
Суьвретте: Расул Сеитов.
