Бизим йигитлер оьз элининъ кызыксынувларын коршалавда аьр заманда да баьтирлик коьрсеткенлер. Буьгуьнлерде де согыс спецоперация еринде куьшли аьдемлер
яв ман куьресип, йогары дережеде исин бардырадылар. Солардынъ арасында – бизим ердеслер, биз олар ман оьктемсиймиз. Мирзабек Маутали увылы Юлушев Дагестан Республикасынынъ Кизляр районынынъ Сангиши авылында тувып-оьскен. Онынъ ата-анасы Маутали Магомед увылы эм Маржанат Мамадали кызы увылын аьдиллик пен оьстиргенлер, атасы ога аьр заманда да эткен исинъди намыслык пан эт деп айтады. Сога коьре, Украина еринде согыс спецоперациясы басланганда, Мирзабек ойланмай, Мурманск областининъ Спутник авылыннан, контракт службасын бардырып турган ериннен яман явга карсы шыгып кетти. Йигит оьзин биринши куьнлерден алып, ол СВО ерине 2022- нши йылдынъ навруз айында йолланган, яваплы, йигерли, намыслы этип коьрсеткен. Сол йыл, караша айында Мирзабек  «За боевые отличия» деген баргыга тийисли болган, бу медальди ол эки кере алган. Сол заман аьскерши яраланган.
СВО еринде аьрекет этуьви барысында аьскерши коьплеген согыс баргыларын алган – «Жуков» медали, «За храбрость», «Участник СВО». Мирзабек Кызыл байраклы сырт флотынынъ 61-нши айырым гвардия Киркенесс Кызыл Байраклы бригадасынынъ тенъиз пехотасында гвардия тамада матросы болып куллык этеди. «Ногай» (онынъ позывнойы) халкы уьшин, Эли уьшин куьшинаямайды.
– Биз енъуьв уьшин согысамыз, сога коьре енъермиз деп бир куьн де шексинмеймиз. Бизим аьвлетлер таза аспан астында яшамага тийисли, – дейди Мирзабек Юлушев. Йигитлеримиз уьйге тез арада енъуьв мен кайтсынлар.
Гульфира Бекова.
Суьвретте: М.Юлушев.