Элимиз оьз тарихи бойынша энъ авыр заманларда йигитлик, коркынышсызлык коьрсетип келген баьтирлери мен дайым оьктемсип келеди. Буьгуьнлерде согыс
спецоперация юрген ерде ортакшылык этетаган аьскершилеримиз, алдына салынган киели борышын йогары оьлшемде яваплы толтырувы ман, сол данъклы аьдетти
тийисли бардырадылар. Олардынъ аьрекетлерине алаллыгы, Элине терен суьйими, оны кайсы коркынышлыклардан да шынтылайын коршаламага аьзирлиги оьз себеплигин этеди. Куьн сайын СВО юрген ерде йигитлеримиз шынты патриотизм сезимлерин, ол тек бос соьз болып калмай, янларын курманлык этпеге аьзир болганын коьрсетип келедилер.
СВО катнасувшысы Манапов Зиявдин – асылы ман Кизляр районынынъ Сангиши авылыннан. Ол Мамай эм Оразбике Манаповлардынъ аьелинде караша айдынъ
25-нши куьнинде тувган.
Ерли мектебте билим алганнан сонъ, Черняевка авылындагы ПТУга туьсип, онда сварщик кесписин байырлайды. Баьри тенълериндей болып, заманы еткенде, 2005-нши йыл аьскер сырасында эр борышын тийисли толтырады. Ол Амур областининъ Благовещенск каласында аьскер сырасында тамада сержант дережесинде алдына салынган эр борышын тийисли толтырган. Аьскер сырасыннан кайткан сонъ, коьп ойланып турмай, Зиявдин онынъ контракт бойынша кызмет эткен агалыинилери, акалары яшайтаган Мурманск областине йол алды. Онда барганда, 2008-нши йыл аьскер боьлигинде контрактка кол басып, кызмет этип келди. Соннан алып ол
туьрли аьскер сыраларында оьз сулыбын байытты. Айтпага, ол тенъиз астындагы кемеде, солай болып, ягадагы морпехотада кызмет эткен.
Сол йылларда юреги мен сайлаган ян косагы ман наьсипли аьел де курды. Яс аьел оьсип, буьрленип, уьш аьвлетлери де тувдылар. 2022-нши йыл, Элининъ уьстинде
авыр заманлар тувганда, ол тасада карап турмады, явдан элин коршаламага СВО юрген ерге кетееги акында уьйдегилерге билдирди. Курал айында аьзирликлерин оьтип, каты урыслар юрген ерде билегин туьрип белсенлик коьрсетип келди.
Зиявдин Мамай увылы Манапов разведротасынынъ боьлик командири эсабында оьз етекшилеви мен алдына кайсы салынган борышларын да яваплы толтырувы ман
баскаланды. СВО юрген ерде яшавшыларга гуманитарлык ярдамын уьлестируьв мен аьрекетлеп, каты урыслары юрген дав майданнан яраланган алты аьскерши йолдасларын да шыгарып, биринши медициналык ярдамын этип оьлимнен куткарган. Явдынъ корсалавыннан сегиз аьскершилерин де шыгарувда оьз
уьлисин коскан. «Град» РПГ-7 реактивлик савытынынъ ярдамы ман явдынъ уьш дронын да атып йок эткен. Ама сары тамбыз айында явдынъ позициясын штурмлап
алувда Зиявдиннинъ аяк астында мина ядырасы атылып, Зиявдин авыр яраланады. Коьп кетпей, аьскерши уьйине савлыгы ягыннан кайтарылады. Согыс спецоперация юрген ерде коьрсеткен йигитлиги эм коркынышсызлыгы уьшин ердесимиз «За отвагу» патшалык савгасына, «Участнику СВО», «За отличия в военной службе» медальлерине тийисли этилген. Сол савгадынъ аьр кайсысын да йигит ердесимиз Аталыгы, тувган Эли, аьдиллик уьшин оьзин аямай, етекшилеви мен салынган кайсы борышын да тийисли толтырганы уьшин казанган. Арамызда Зиявдин Манаповтай йигит аьскершилеримиз болган шаклы, Элимиздинъ
келеектегиси парахатлыэм коркынышсыз.
Г.Нурдинова.
Суьвретте: Зиявдин Манапов.
