СВО катнасувшыларынынъ оьз тарихи бар – бирев контракт службасына кол баскан, экиншиси мобилизация бойынша кеткен, уьшинши – оьз эрки мен. Не деп айтсак та, олар баьриси де – баьтирлер. Заман оларды сайлады. Ким уллы Россиядынъ кызыксынувларын оьзиндикилерден оьрге салды. Ким согыс спецоперациясы басланганнан алып билетаган эди, мен явды урмага кетермен. Эм енъермен. СВО басланган заманнан уьш йылдан артык кетти. Сол йыллардынъ ишинде россия
аьскершилери туьрли аьллерде болып уьлгирдилер: биреви досын йойытты, баскасы яраланды, уьшиншиси корсалавга туьсти. Коьплеген йигитлер баьтирликлери уьшин согыс медальлер мен, орденлер мен савгаланганлар. Туьнегуьнлерде орамда топ ойнап юрген кеделер буьгуьнлерде согыс еринде алдышылыкта яв ман куьресип турадылар. Кашан да, коркынышлы болгандыр, боьтен де биринши согысувларда кыйынлы эди. Соьйтип оьзлери аьскершилер хабарлайдылар. Сонъында
олар катадылар, уьйде оларды енъуьв мен куьтип турганын эслерине алып, явды йойытувга савлай куьшин салып, согысадылар.
Замир Калыковка янъыларда 30 яс толды. Артта – Алтай крайынынъ Алейск каласында эр борышын толтырув. Эм Сирия. 2017- нши йылда Замир Калыков контрактка кол баскан эм Мурманск областининъ Спутник поселогында куллыгын баслаган. Бу ерден аьскерши Сирияга, сонъында Украина ерине кеткен. Эр борышын толтырган заманда Замир ДНР еринде болган. Онынъ аьели бар – хатыны Милана, увыллары Эмин эм Умар. Олар энъ де ювык аьдемин куьтедилер, сол аьскершиге кыйынлы согыс йолларда куьш береди. Замир Калыков Кизляр районынынъ Сангиши авылында тувган (тувган авылынынъ атын аьскерши позывной этип алган).
СВО ерине Замир 2022-нши йылдынъ навруз айынынъ 16-ншы куьнинде кеткен. Сол йыл курал айында яс яраланады, госпитальде эмленип шыгып, тагы да алдышылыкка кетеди. Замир Калыков тенъиз пехотада гвардия тамада сержант званиесинде куллык этеди.
Баьтирлерше оьзининъ согыс борышын толтырганы уьшин йигерли йигитимиз патшалык баргылар ман савгаланган – «За отвагу», «Доблесть и отвага», «За разминирование», «За службу в морской пехоте», «За участие в военной операции в Сирии», «Участник СВО», «За усердие при выполнении задач инженерного обеспечения».
Туьрли аьллерде согыспага туьсти Замир Калыковка. Не болса да, сондай кыйынлы аьллерде беркленеди шынты эр дослык. Бизим йигитлер бир-бирисин коьтергишлейдилер, баьри зат пан да боьлиседилер. Олар туьрли, тиллери де, динлери де баска, тек бир зат оларды бирлестиреди, куьш береди –  Аталыкты, тувганларды, аьеллерди эм бизим баьримизди де коршалав. Бизим аьскершилердинъ бактыларында – уьйкен баьтирлик. Уллы Россия оьз увыллары ман оьктемсийди.
Гульфира Бекмуратова.
Суьвретте: З.Калыков.