Уьстимиздеги йылдынъ сары тамбыз айынынъ 16-17-нши куьнлеринде Татарстан Республикасында «Татар атлары» деген Экинши халклар ара фестивали уйгынланып озды. Фестивальде Туркменистан, Казахстаннан уьш командалары, Самара, Челябинск, Москва областьлериннен, Башкирия, Мордовия, Чувашия, Татарстаннан эки командалары эм доьрт спортсменлерден, айтпага, Ялет Елманбетов, Алан Идрисов, Хасан Суюндуков, Кемалуддин Нурлубаевтен туьзилген ногай командасы ортакшылык эттилер. Шара катнасувшылары, айтпага, «Коьк боьри», «Авдарыс», «Тай тулак», «Тенге алув», «Ат уьстиннен ок атув», «Атшабыс» спорт кеплери бойынша оьзлерин сынап, ат уьстинде усталык пан турувын коьрсеттилер. Командалык биринши орынын Актюбеден (Казахстан) спортсменлери казандылар.
«Авдарыс» спорт кебининъ финал кезегинде ердесимиз Ялет Елманбетов экинши орынга тийисли этилди. Фестивальдинъ «Коьк боьри» кеби бойынша ногай командасы уьшинши орынга тийисли этилди. Татар Республикасында оьткен фестивальде ортакшылык эткен ердеслеримизди коьрсеткен етимислери мен кутлап, келеекте оларга ногай халкынынъ атын элимиздинъ туьрли муьйислеринде эситтирип, танытып келгенин йораймыз.
Суьвретте: Ялет Елманбетов, 2-нши орын иеси болган мезгили.