Байрам календаринде Окытувшылар куьни – энъ белгили эм суьйикли кеспи байрамларынынъ бириси. Окытувшыдынъ иси энъ де онъайлы, яратувшылыклы эм керекли. Орыс язувшысы Николай Гоголь булай деп айткан: «Баскага тербия берер уьшин, биз бас деп оьзимизди тербияламага тийислимиз». Окытувшы кесписин
сайлаган аьдем, солай болып, саьбийлерди суьюв, шыдамлык, оьз исине алал болув, куллыксуьерлик, оптимизм сапатлары ман баскаланмага тийисли. Янъы яшав йолына туьскен яс аьдемди коьп затларга уьйретуьв – ол оьнерлик. Аьр кайсымыздынъ да яшав йолымызда эсимизде ярык ыз калдырган уьйкен аьриптен окытувшыларды расады.
Мине кырк оьмирден артыгын сулыплы окытувшысы Аминат Янпуевна Эсполова Нефтекум округындагы Абрам-Тоьбе авыл орта мектебинде оьз окувшыларынынъ
юрегине ашкыш тавып, сокпак салып, оларга юрек йылувлыгын аямай багыслап келеди. Уста кеспи иеси асылы ман – Ногай районынынъ Карагас авылыннан. Ол 1959-ншы йыл карагыс айынынъ 11-нши куьнинде тувган. Кыскаяклыдынъ ерли мектебти тамамлап, бала шактан окытувшы болаякпан деген мырадын яшавга шыгарган куьни де етти. Махачкаладагы педагогикалык институтынынъ биология факультетине туьсип оны етимисли тамамлайды. Сыйлы кеспи иеси сайлаган оьз педагогикалык аьрекетин Нефтекум районынынъ Мурзабек авылындагы ерли кишкей мектебиннен баслайды. Алыс 1984- нши йылдан алып бу куьнлерге дейим Абрам-Тоьбе авыл орта мектебинде окытувшылык сулыбын байытып, ясларга коьрим, насихатшы болып келеди. Яшавынынъ ярты оьмирге ювыгын, 46 йылларын, оьз
юрек йылувлыгын, исси суьйимин Аминат Янпуевна оьз суьйикли тербияланувшыларына, янга якын мектебине аямай багыслайды. Окытувшыдынъ мектебте озгарган кайсы дерислери, сабаклары, класс саьатлери, ата-аналар уьшин йыйынлары, туьрли шаралары да йогары оьлшемде уйгынланып, кызыклы оьтедилер. Аминат Янпуевна баьри затты да заманзаманы ман этип уьлгирмеге шалысады. Онынъ окувшылары биология, химия дерислериннен олимпиадаларында катнасып, енъуьвши орынларынынъ иеси болып кайтадылар.
Сулыплы окытувшы коьпйыллык аьрекети, яс несилин окытувда эм оларды тербиялавда етискен уьстинликлери уьшин Ставрополь крайынынъ билимлендируьв министерствосы, Нефтекум кала округы бойынша администрация бойынша билимлендируьв боьлиги атыннан Сый грамоталар, дипломлар ман коьп кере белгиленген.
Ол яшавдынъ кенъ йолына коьплеген выпускниклер несиллерин аьзирлеп салган. Сулыплы окытувшы оьзининъ окувшыларынынъ яшав бактылары ман дайым кызыксынып келеди, буьгуьнлерде де олардынъ маслагатшысы болып, йылы соьзлерин аямай багыслайды. Онынъ окыткан окувшылары юрек шакырувы ман суьйген
кеспилерин сайлап, элимиздинъ туьрли муьйислеринде оьз аьрекетлери мен элине пайда аькелип, онынъ оьрленуьвине оьз уьлисин косып келедилер. Окытувшыдынъ йолын ызлаган кайбир выпускниклери де буьгуьнлерде бактыларын педагогикалык иси мен байланыстырып, оны ман бирге окув ошагында яс несилди
билимлендируьвге сав куьшин багыслап келедилер. Ол биология, химия окув сабакларыннан патшалык сынавларга аьзирленуьвде окувшыларга оьз коьмегин этуьви мен каьрлейди.
Ол наьсипли аьдем, неге десе оьзининъ суьйген исинде бийик уьстинликлерге етисип келди.
Оьз кесписининъ устасы, биринши дережели окытувшы болып калмай, оьз аьелинде суьйикли эм азиз ана, оьз уныкларына, йиенлерине суьйикли тетей эм эней болады. Ол оьзи мен бирге коьп йыллар бойы мектебте куллык этип келген ян косагы Мавлимберди Исаевич пен аьвлетлерин оьстирип, тувра яшав йолына
онълаганлар. Айтпага, Альбина кызлары Ставрополь каласындагы кардио-орталыгында медсестра болып, увылы Эльдар – йогары дережели врач, Ставрополь крайындагы Левокум район больницасынынъ хирургия боьлигин уьстинликли етекшилеп келеди. Етимисли педагогтынъ куьезин эм куванышын буьгуьнлерде балдан таьтли тогыз уныклары эм йиенлери арттырадылар, окувдагы, яшавдагы оьз уьстинликлери мен боьлисип, оны йыйы суьйиндирмеге шалысадылар. Сол тувылма аьдем уьшин шынты наьсип! Окытувшылардынъ кеспилик байрамынынъ куьнинде Аминат Янпуевнады ак юректен кеспи байрамы ман кутлап, ога берк ден савлык,
узак оьмир, келеекте де суьйикли исинде коьп етимислер, коьплеген уьстинликли выпускниклерди йораймыз.
Г.Нурдинова.
Суьвретте: Аминат Эсполова.
