Ызгы йылларда тувган миллет ногай тилимиздинъ йойылып барувы бизди навасызландырмай болмайды. Бизим ана тилимиз – ол бизим ата юртымыз, бесикте шайкалган тувган уьйимиз, Ногай шоьллигимиздинъ ярык коьрки.
Сонынъ йойылувы ман халкымыздынъ аьдетлери, маданияты, санияты, миллет баскалыгы да йойылады. Аьлиги енъил тувыл заманларда биз оьзимиз ана тилимизди сакламасак, соны бирев де сакламаяк, эм сол затты аьр биримизге ашык кепте анъламага керек болады.
Айтылган маьселе мен байланыста «Шоьл тавысы» республикалык газетасынынъ редакциясы тувган тилимизди саклав эм таралтув ниетте ногай авылларындагы мектеб окувшылары, балалар арасында, «Ынанмайман тилди муттым дегенге» деп атап, кезекли адабият конкурстынъ озгарылувы акында билдиреди.
Конкурска сонынъ ортакшылары ана тилинде язылган оьз ятлавларын, сочинениелерин, хабарларын йибермеге боладылар. Материалларды редакцияга сонынъ электрон почтасына: golosstepi@etnomediadag. ru яде Терекли-Мектеб, Карл Маркс орамы, 49 адреси мен конвертке салып почта аркасы ман йибермеге яде тувра редакцияга аькелмеге де боладылар. Конкурска материаллар 1-нши октябрьден 20-ншы декабрьге дейим алынадылар. Сонынъ сырагылары 25-нши декабрьде газетамыздынъ янъыйыллык номеринде баспаланаяк. Конкурс сырагылары бойынша 1-нши орынды алган катнасувшыга – 5 мынъ маьнет, 2-нши орынга – 3 мынъ маьнет эм 3-нши орынга – 2 мынъ маьнет акшалай баргылар шатлыклы аьлде редакцияда 29-ншы декабрьде тапшырылаяк.
«Шоьл тавысы» республикалык газетасынынъ редакциясы.