Дагестан Республикасы бойынша Россиядынъ социаллык фондынынъ боьлигининъ управляющийининъ исин кесек заманга юритуьвши Алжанат Загидова
янъыларда ис йорыгы ман Ногай районында болып кетти. Ол мундагы Социаллык фонд куллыкшылары ман йолыгысты, оьз соравлары ман фондка келген аьдемлер
аьжетсизленуьв йорыгын да тергеди.
Алжанат Загидовага бу куьн СВО катнасувшысынынъ анасы Альмира Бесленеева увылына берилмеге тийисли тоьлевлер токтаганы ман байланыслы болган соравын шешпеге тилеги мен келди. Алжанат Загидова Ногай районындагы «Аталыкты коршалавшылар» фондынынъ координаторы Аскерхан Межитовты аьлди
толысынша белгимеге шакырды. Сонъ ол йорык ДР-дагы орталык пан байланысты эм сорав тергевге алынды.
– СВО катнасувшылары – Элимизге кыйынлы заманларда оны коршалавга турган аьдемлер. Олар бизим таза аспанымыз уьшин куьреседилер, Россиядынъ кызыксынувларын коршалайдылар. А оларды коьтергишлев бизим киели борыш. Спецоперация аьскершилери уьшин Россиядынъ социаллык фондынынъ бойсынувында болган 12 реабилитационлык орталыклар бар, сонда биз СВО катнасувшыларын йиберемиз. Реабилитационлык орталыкта ял алган аьскершилер бек разы болып кайтадылар, тек Ногай районыннан бизге аьли де бирев де келгени йок. Сондай орталыкларда тыншаймага суьйгенлер болса, билдиринъиз, биз оларды сонда йиберермиз, – деди Алжанат Загидова.
Ногай районындагы ДР бойынша Россия социаллык фондынынъ боьлигининъ клиент службасынынъ етекшиси Мадина Абдулалимова СВО катнасувшыларын
эм олардынъ аьеллерин коьтергишлев бойынша Яшавшыларды социаллык яктан коршалав фонды ман биргелесте эткен иси эм «Аталыкты коршалавшылар» фондынынъ куллыгы акында хабарлады. Алжанат Абдулжабаровна ис визити бойынша фонд куллыкшыларына да оьз соравларын, маслагатларын берди. Ол фонд ис коьрсеткишлерге коьре регионда куллыктынъ хайырлыгы бойынша алдышы орынларда экенин белгилеп, йогары белги берди, ызгы заманларда ийги якка туьрленислер болганын да айтты. Онынъ соьзлери мен, специалистлер яктан шагынувлар йок, а район яшавшылар фондтынъ аьжетсизлеви мен разылар.
Шара барысында Алжанат Загидова Социаллык фондынынъ эм социаллык страхованиесининъ куллыкшылары сырасында,
Уллы Енъуьвдинъ 80 йыллыгына багысланып озгарылган республика шахмат турниринде 3-нши орынга тийисли болган эм Дагестан Аькимбасынынъ савгасына
футбол бойынша республикалык турниринде де команда сырасында катнаскан алдышы специалистэксперт Юсуп Эсенгельдиевке Разылык тапшырды.
Н.Кожаева.
Суьвретте: шарадан коьринис.
