Оьткен юмада Ногай район администрациясынынъ кенъеслер залында янъыларда сайланган 8-нши шакырувдынъ Ногай район Депутатлар йыйынынынъ 1-нши сессиясы болып озды.
Сессияды оьткен 7-нши шакырувдынъ район Депутатлар йыйынынынъ председатели Рустам Байманбетов ашты. Оьзининъ соьзинде ол янъыларда сайланган район йыйынынынъ депутатларын кутлады, коьп йыллардан бери тагы да депутатлар бир тилге, бир ниетке келип баьриси де бу залга йыйналганын айырым белгиледи.
Рустам Байманбетов, район депутатлар йыйынынынъ председатели сайланганша, сессиядынъ куллыгын армаган юритуьв уьшин, аьдетке коьре, район депутатларынынъ арасындагы энъ де эслиси Залимхан Кулаевти президиумга шакырды. Депутатлар Ногай район Депутатлар йыйынынынъ председатели уьшин
тавыславдынъ йорыгын беркиттилер эм бу яваплы ис орынга депутат Алибек Менласановты коьрсеттилер эм онынъ кандидатурасы уьшин бир ниеттен тавысларын бердилер. Сессиядынъ барысында район парламентарийлери солай ок депутат Амирхан Юнусовты район Депутатлар йыйынынынъ аьр заманлык депутаты этип
сайладылар. Муннан сонъ районнынъ янъы депутат корпусына каратылган соьзи мен Ногай район администрациясынынъ басшысы Джамалутдин Эсиргепов соьйледи. Ол соьзининъ басында ок Ногай районы сайлавлар ягыннан эндигиси тынышлык пан рахатлык тапты деп белгиледи. Онынъ айтувы ман, буьгуьнги сессияга район депутатлары баьриси де йыйылганлар, тек биреви авырсынганлыктан келмеген. Джамалутдин Эсиргепов район администрациясы эм оьзининъ атыннан янъыларда сайланган район депутатларын кутлады, оларга исинде уьстинликлерди йорады. Муниципалитет етекшиси Депутатлар йыйынынынъ быйылгы сырасында яс депутатлар коьп экенин айырым белгиледи эм сол зат, онынъ ойына коьре, суьйиндирмей болмайды, неге десе олар онълы йол ман куллык этпеге деп келгенлер. Район етекшиси муннан алдынгы шакырувдынъ район депутатларына СВО катнасувшыларын, олардынъ аьеллерин, миллет эм республикалык инвестпроектлерди
колтыклавда эткен уьйкен ис аьрекети уьшин разылыгын билдирди. «Биз сол исти аьр йыл сайын кулланувга беретаган янъыртылган эм янъы курылган
мектеблерде, юритилген капиталлык ярастырув куллыкларынынъ сырагысында, айтпага: быйылгы БатырМурза авылдагы янъы ашылган мектеб
меканында, А-Х.Джанибеков атындагы мектебинде, район орталыгындагы эки де балалар бавында, музей уьшин ярастырылып турган меканда коьремиз. Бу ислер бизим алдынгы шакырувдынъ депутатларынынъ куллыгы.
Мен буьгуьнги янъы шакырувдынъ депутатлары да тап соьйтип етимисли кепте ислегенлерин йорайман, халкымыздынъ яшавы куьннен-куьнге ийгиленип барсын!
Аьли коьз алдымызда сайланып турган район Депутатлар йыйынынынъ председатели Алибек Менласановты эм сонынъ аьр заманлык депутаты Амирхан Юнусовты да кутлайман. Мен сизди коьптен бери билемен, Алибек Менласановтынъ алдынгы куллыкларын да белгилемеге суьемен. Ол бизде 6-ншы кере шакыртылган район Депутатлар йыйынынынъ сырасында район администрациясынынъ физкультура эм спорт боьлигин етекшилеген, буьгуьн де тренер болып куллык этеди эм район яшавынынъ сапатын ийгилендируьвге тек оьз косымын этип калмай, соны ман бирге бизим ясларымызды да тербиялайды. Сондай аьдем, меним ойыма коьре, законлар яратувшылык куллыгын да бажарып болар. Алдынгыдай болып, биз, районымыздынъ толтырувшы эм законодательли власть бутаклары, эндиги де
биргелесип ислермиз», – деди Джамалутдин Эсиргепов.
Сессияда Ногай район администрациясынынъ билимлендируьв боьлигининъ начальниги Амирхан Межитов та шыгып соьйледи эм буьгуьнги ямагатполитикалык шара тарих оьзгериси болып саналады деп белгиледи. Амирхан Межитов район бойынша депутат мандатларынынъ 80 процентин «Единая Россия» политикалык партиясынынъ ваькиллери алганын да айтты.
Район депутатларынынъ янъы сырасын «Шоьл тавысы» республикалык газетасынынъ бас редакторы Эльмира Кожаева да кутлады. Эльмира Кожаева аьлиги заманларда маьнели маьселелердинъ бириси СВО катнасувшыларына эм олардынъ аьеллерине эс этуьв эм ярдам беруьв деп белгиледи. Ол октябрь айында район еринде СВО катнасувшыларына коьмек этуьв акциясын озгармага кенъес этти. Онынъ сондай маслагатын район басшысы Джамалутдин Эсиргепов макул коьрди.
Сессиядынъ ызында район Депутатлар йыйынынынъ янъы сайланган председатели Алибек Менласанов ога сондай бийик сеним эткен район депутатларына разылыгын билдирди. Ол солай ок баьри депутатлар да тек биргелесип эм макулласып тувган районымызды оьрлентуьв уьшин кыйын салармыз деген сенимин ашык билдирди.
М-А.Ханов.
