Бу куьнлерде Дагестан Республикасында «Янлары куьшли аьдемлер» (Сильные духом) документальли фильмининъ премьерасы барады.
Янъыларда ол Ногай районынынъ халк яратувшылык орталыгында да коьрсетилди. «Янлары куьшли аьдемлер» кинолентасы СВО барысында Элимиз уьшин
янын аямаган йигитлерге эм олардынъ аналарына багысланган. Ол аналардынъ юрек шанышувы, ян куьшлилиги, эрклиги акында, бу аьлемет хатынлар аьзиз увылларынынъ эстелигин саклар уьшин яшамага, ислемеге, баскаларга ярдам этпеге де куьш табадылар. Бу фильм – СВО катнасувшылары сырасында энъ де бириншилерден оьлимсизликке абыт алган он йигит акында хабар, олардынъ аьр бирисине Уллы Аталык согысы йылларында фашистлерди соккан уьйкен
атайлары коьрим болганлар, ол – шетсиз ян авырув, соны ман бирге оьктемлик!
«Янлары куьшли аьдемлер» фильми Дагестан Республикасынынъ Аькимбасы Сергей Меликовтынъ коьтергишлеви мен, СВО барысында баьтирлерше
ян берген йигиттинъ анасы Мехрибан Муслимовадынъ баславы ман туьзилген. Бу кыскаяклы фильмге оьз ян авырувын эм йигитлердинъ коьрсеткен баьтирлигин
оьмирлетпеге ымтылысын салган. Мехрибан Муслимова – запаста болган прапорщик, яшавынынъ коьп йылларын РФ Савытлы куьшлеринде куллык этуьвге багыслаган, онынъ ян йолдасы Эрзиман Азимович Эрлик ордени эм «За отвагу» медали мен савгаланган, увыллары Эрлик орденининъ иеси, офицер Азим Муслимович ата-анасынынъ йолы ман барган, Угледар касында йигитше ян берген. Ногай районына «Янлары куьшли аьдемлер» фильми мен таныстырмага баславшы куьп келди: «Сила матерей» ямагат организациясынынъ беркитуьвшиси Мехрибан Муслимова, Эрлик орденининъ иеси гранатометчик Сунгур Алиевич Османовтынъ анасы Месей
Османова, Эрлик орденининъ иеси взвод командири Джамал Ханбабаевич Сухбетовтынъ анасы Тамара Сухбетова. Фильмнинъ премьерасында Ногай район аькимбасы Джамалутдин Эсиргепов, онынъ орынбасары Мурат Шадиев, район Депутатлар Йыйынынынъ председатели Алибек Менласанов, ямагатшылар, СВО катнасувшыларынынъ аьеллери, окувшылар, окытувшылар, мектеблер етекшилери, район организациялар куллыкшылары эм етекшилери болдылар.
Шарады ДР ат казанган маданият куллыкшысы, район орталык китапхана етекшиси Сабират Абубекерова ашып юритти. Фильм коьрсетуьви алдында йыйылганларга соьзин Ногай район аькимбасы Джамалутдин Эсиргепов каратты: «Бу проект бизим баьтирлер – согыс спецоперация катнасувшыларынынъ эсин саклавды
коьрсетеди. Элимизге кыйын заманда, олар оьзлерининъ атайлары эм уьйкен атайларындай болып, бириншилерден Аталыгын коршаламага турганлар. «Янлары куьшли аьдемлер» фильми тарих акыйкатлыгы эм оьсип келеяткан яс несилде патриотизм эм яваплылык сезимлерин тербиялав керегин эске салувшы болсын.
Мен республика етекшисин фильмди туьзуьвде эткен коьтергишлеви уьшин эм проект авторларына уьйкен савбол айтаман. Ян авырувына карамастан бу хатынлар межигитлер салмага, бавлар шашпага, китаплер шыгармага, яс несилди тербияламага куьш табадылар.
Бу уллы ис аркалы яшавдан кеткен баьтирлер оьлимсиз боладылар».
Шара барысында проекттинъ баславшысы Мехрибан Муслимова, «Сила матерей» сообществосынынъ белсеншиси, СВО барысында янын берген офицер Кайтарбий Елманбетовтынъ анасы Альмира Баякаева, «За заслуги перед Отечеством» Орденининъ медали мен савгаланган СВО катнасувшысы Джамал Саадиновичтинъ
анасы Кайтархан Отегенова шыгып соьйледилер. Кайтархан Юсуповна Альмира Баякаевага багыслап аьптеси язган ятлавды окыды.
Сонъ ДР Халк артисти Фатима Нурлубаева «Согыста ана увылын йойды» деген йырды йырлады, сол аьсерде Кадрия атындагы мектебининъ юнармеецлери
СВО барысында яс янларын берген ердеслеримиздинъ суьвретлери мен залга кирдилер.
Юрекке тийген шыгып соьйлевлерден сонъ, «Янлары куьшли аьдемлер» фильми коьрсетилди.
Мага коьре, фильм коьрсетилген шакта залда олтырган каравшылардынъ юреклери бир аьдемдикиндей болып, бирге ургандай болды, неге десе бизим баьримизди де бир ян авырув, оьзлеринде болган энъ де баалы – увылларын йойган аналардынъ казасын йылы соьз бен, бир кишкей болса да, енъил этпеге аваслыгымыз биргелестирди. Бизим юреклерди, сызлав ман бирге согыс йолдасларын коршалап, оьзлерин аямаган йигитлеримиз уьшин, оьктемлик бийледи. Бирев
йолдасын оьзи мен япкан, баскасы граната атып, оьзи мен бирге явларды да аькеткен, баскасы техникады эм йолдасларын саклар уьшин оьзи акында ойламаган,
соьйтип олар баскады куткарып, баьтирлерше янларын бергенлер. А баскалай болып та болмайды. Олар Дагестанда тувып -оьскен бизим эр кисилер, оларды
куьшли хатынлар тербиялаганлар. Бу баьтирлер акында токтавсыз айтпага болады. Он баьтирдинъ аьр бирисининъ уьйкен атайлары Уллы Аталык согысынынъ
ветеранлары болганлар. Тек олар, уьйкен суьйинишке, давдан аман- эсен уьйлерине кайтканлар, а бизим заманнынъ баьтирлери яшавларын Эли уьшин, савдуныядагы тынышлык, нацизмсиз дуныя уьшин бергенлер. Ярасык, аьлемет Дагестанды дайым да тавлар эли деп атаганлар, аьли болса баьтирлер эли деп айтадылар. Мунда шынты йигитлер тувадылар, туьрли заманларда – оьз баьтирлери. Олар ман савлай Дагестан эм савлай Россия оьктемсийди. Фильм коьрсетилген сонъ онынъ акында оьз ойлары ман Ногай район аькимбасы Джамалутдин Эсиргепов, Согыс эм ис, Савытлы куьшлерининъ эм ыхтыяр саклавшы органларынынъ ветеранлар советининъ
председатели Акманбет Сангишиев, СВО барысында яс янларын берген йигитлердинъ аналары Медина Кожахметовна Муталимова эм Оразбике Солтановна Джумандыкова, солай ок Жуков атындагы эм «За боевые заслуги» медальлери мен савгаланган СВО катнасувшысы, офицер Арсен Ярикбаевтинъ анасы Курасхан Джумагельдиевна боьлистилер.
«Янлары куьшли аьдемлер» фильми бизим юреклерде мутылмас ыз калдырды. Бизге, хатынларга, коьзясларды токтатув кыйын эди, олай десем де, эр кисилердинъ де юрегин бу фильм козгамай калмаганы сезилмей болмады. Ол бизим баьримизге де дайымлык баалыклар эм Эл алдында киели борыш акында эске салды.
Нурият Кожаева,
РФ Журналистлер союзынынъ агзасы.
Суьвретте: шарадан коьринис.
