Янъыларда, Дагестан Республикасынынъ бас каласы Махачкалада ерлескен Дослык уьйинде, Россия Федерациясынынъ туьрли регионларыннан сегиз юз аьдемди
йыйган антитеррористлик форум болып озды. Сонынъ бас ниети Дагестан Республикасында терроризм идеологиясына карсы турувды коьрсетуьв эди.
Доьрт куьн узагында, уьстимиздеги йылдынъ казан айынынъ 7-11-ншы куьнлеринде, озган форум ишинде бек коьп пайдалы шаралар оьткерилдилер, айтпага,
тоьгерек столлар, терроризм темасы бойынша хабарласув майданлар, яшавшылар араларында терроризмге карсы профилактикалык ислер акында семинарлар…
Бу форум доьрт куьн узагында тек республикамыздынъ бас каласында болып калмады, бир кесеги
Дербент каласында да оьтти. Форумда экстремизм эм терроризм профилактикасы бойынша экспертлер, согыс спецоперациясынынъ аьскершилери, дин, илми
эм ямагат ваькиллери ортакшылык эттилер. Олардынъ баьрисининъ куьш салувы ман терроризм мен куьресуьвде эффективли йосыклар эм сол маьселеди шешуьвде тувра карарлар ойласылдылар. Дагестан Республикасында оьткен терроризмге карсы форумнынъ биринши куьнинде оьзгерисли пленарлы йыйын болды,
сонда Дагестаннынъ премьерминистрининъ орынбасары Рамазан Джафаров, Россия Баьтири, ДР дин ислери эм миллет политикасы бойынша министрининъ исин толтырувшы Темирлан Абуталимов, Россия Баьтири Магомед Баачилов катнастылар.
Солай ок форумга конак болып шакырылганлар ишинде мусылманлар дуныясы ман катнаслыкты тутувшы Русьтинъ Москва патриархындагы экспертли советининъ председатели Григорий (Матрусов), «Спас» телеканалынынъ специальный корреспонденти Александр Егорцев, Пятигорск патшалык университетининъ терроризм эм экстремизм бойынша профилактикалык Орталыгынынъ етекшиси Ибрагим Ибрагимов, савлыкты коршалав бойынша РФ Госдумасынынъ комитетининъ организациясынынъ савлыкты ийгилендируьв соравлары бойынша Экспертли советининъ агзасы Марина Григорьян эм баскалар бар эдилер.
Оьз соьзинде форумда Трофим Татаренков оьткен йыл белгиленген «триумвират» концепциясы акында айтты, олай дегени, аьдемде тербия, билим эм оьз ыхтыярын
яклап болувы йогары дережеде болмага керек. Сол уьш зат аьдемди де кеплейди. Сол уьшевдинъ уьстинде ис те юритилмеге тийисли болады. Спикердинъ белгилевине коьре, тербия баьри заттан да маьнели болады эм сол форумда каралган соравларынынъ басы да болды. Белгилеп озайык, бу форумды Дагестан Республикасынынъ дин
ислери эм миллет политикасы бойынша министерствосы Дагестан Республикасынынъ Антитеррористлик комиссиясынынъ эм Миллет антитеррорристлик комитетининъ колтыклавы ман оьткерди.
Л.Бекмурзаева.
