Белгили орыс язувшысы, дуныялык адабиятынынъ классиги Лев Толстой окытувшыдынъ акында булай деп язган: «Ийги окытувшыга эки сапат келисли, айтпага,
ол терен билимли, кенъ эм уьйкен юрекли болмага тийисли», деген. Сол сапатлары меним буьгуьнги хабарымнынъ бас геройына бек келисли болар деп ойлайман.
Окытувшы кесписине алал болувы, исине савлай юреги мен берилуьви – тамамында оьз емисин де береди.
Янъыларда ЭркенЮрт авылындагы Суюн Имамалиевич Капаевтинъ атындагы орта мектебиннен орыс тил эм адабиятыннан окытувшысы Загират Назировна Суюнова коьпйыллык эм яваплы ис аьрекети, педагогикалык исиндеги бийик уьстинликлери уьшин «Карашай-Шеркеш Республикасынынъ ат казанган окытувшысы» деген сыйлы атына тийисли этилди деген суьйинишли хабар келди.
Сулыплы педагог 1954-нши йылдынъ кырк кийик айынынъ 29-ншы куьнинде Адыге-Хабль районынынъ Икон-Халк авылында Назир эм Татуэй Джемакуловлардынъ
коьпбалалы аьелинде тувып-оьскен. Ерли мектебти тамамлап, бала шактан окытувшы болаякпан деген мырады яшавга айланган заманы да келди. Ога бала шактан
онынъ уьйкен абайы, КЧР ат казанган окытувшысы Анна Шахингереевна Джемакулова эм коьп йыллар бойы балаларды ногай тилине эм адабиятына окытып келетаган
оьнерли педагог аданасы Хасан Назирович Джемакулов яшавында уьлгили коьрим болып келди. 1972-нши йыл ол Карашай-Шеркеш патшалык институтынынъ
филология боьлигине туьсип, оны 1977-нши йыл етимисли тамамлайды.
Оьз ис аьрекетин окытувшы кесписин байырлаган кыз Джегута авыл орта мектебинде баслайды.
Бир йылдан сонъ Адыге-Хабльский районынынъ Эркен-Юрт авылыннан Альберт деген йигит пен бактысын байлап, эки яс аьел курадылар. Яс аьелге баслап,
Саха Республикасындагы Якутск, оннан сонъ, 1986- ншы йылда алыс Сургут калаларында яшап куллык этпеге туьсти. Сургут каласында Загират Назировна сегиз йыллар бойы балалар бавында тербиялавшы иси бойынша сулыбын байытып келди. Эркен-Юрт авылына Суюновлардынъ аьели 1994-нши йыл кайтады. Соннан алып буьгуьнлерге дейим сыйлы кеспи иеси ерли мектебте орыс тил эм адабиятын яс несил арасында таралтып келеди. Ол тек орыс тил эм адабияты бойынша сабагыннан окытувшы болып калмай, оьзи етекшилейтаган класс окувшыларынынъ яшавын кызыклы, татым этпеге шалысады. Буьгуьнлерде ол бес выпускларын яшавдынъ кенъ йолына онълаган, олардынъ кайбиревлери оьз насихатшысынынъ йолын ызлап, окытувшы кесписи бойынша яс аркады билимлендируьвде куьшлерин сынап келедилер. Буьгуьнлерде элимиздинъ туьрли муьйислеринде оьз сайлаган ислери бойынша уьстинликлер казанганлары да аз тувыл. Олар оьз окытувшысына, класс
етекшисине кайсы байрамда да йылы саламларын, йоравларын йибермеге мутпайдылар.
Загират Назировнадынъ юрек шакырувы ман сайлаган кесписине алаллыгы, исинде коьрсеткен етимислери КарашайШеркеш Правительствосы, Халк Йыйыны, республика, район администрация, мектеб атыннан туьрли Сый грамоталарына, дипломларына, туьрли баргыларына коьп кере тийисли этилген.
Онынъ тербияланувшылары орыс тил эм адабиятыннан туьрли олимпиадаларынынъ катнасувшылары болып, баргылы орынларын казанып, мектебининъ сыйын коьтерип келедилер.
Ол оьз ис аьрекетин яны ман суьйген уьйкен аьриптен окытувшы болып калмай, эри Альберт пен (яткан ери ярык болсын) бирге уьш суьйикли аьвлетлерин, айтпага,
Гульнара, Бэлла эм увылы Муратты оьстирип, билим берип, олардынъ аьр кайсысын да яшавдынъ тувра йолына онълаган наьсипли ана, аьзиз тетей эм эней де болады. Суюновлардынъ уьйкен кызлары Гульнара Ставрополь каласындагы диагностикалык орталыгында гинеколог-эндокринолог врачы болып аьрекетлейди, Бэлла Ставрополь каласындагы СТВ телекомпаниясында юрист исин етимисли юритеди. Мурат увылы коьп заман КЧР администрациясында куллык этип келген, буьгуьнлерде болса, Невинномысск каласындагы железнодорожный аьскер боьлигинде контракт бойынша кызмет этеди. Окытувшыдынъ балдан таьтли ети уныклары эм йиенлери онынъ куьезин арттырып, оны куьн сайын оьз етимислери мен суьйиндирмеге асыгадылар.
Биз де сулыплы окытувшыды ак юректен янъыларда тапшырылган бийик савгасы ман кутлай келип, ога берк ден савлыкты, узак оьмирди, ис аьрекетинде келеекте де
йогары етимислери коьп болганын йораймыз.
Г.Нурдинова.
Суьвретте: Загират Суюновага савга тапшырылув мезгили.
