Янъыларда Краснодар каласында Россия халкларынынъ миллет маданият бирлиги ягыннан оьрлендируьвде эм беркитуьвде этип келген косымы уьшин «Гордость нации – 2025» деген VI Савлайроссиялык ямагат баргысынынъ регионлар ара округ бойынша кезегинде енъуьвшилерге шатлыклы аьлде савга тапшырылды. Округ бойынша конкурсынынъ енъуьвшилерининъ санына бизим ердесимиз, Астрахань области бойынша халк маданиятынынъ илмиметодикалык орталыгынынъ
билимлендируьв технологиялар боьлиги бойынша етекшиси Расул Асаевич Шугаипов та кирди. Ол халк маданиятынынъ тармагында, оны билимлендируьв ягыннан канагатлав аьрекети мен 35 йыллардан артык куллык этип келеди. Буьгуьнлерде Расул Шугаипов – маданият ара коммуникациялар тармагында сулыплы медиаменеджерлердинъ бириси. Ердесимиз уьшин савга – тек кеспилик эм ямагатлык етимислерин оьрметлев болып калмай, келеекте аьрекетине куьш беруьв
болады.
– Бу конкурс халкларды бирлестируьвге келисуьвлик ямагатын туьзуьвге, элимиздинъ маданият туьрлилигин саклавга эм оьрлендируьвге савлайымыздынъ да ортак шалысувымыздынъ белгиси болады, – дейди оьз соьзинде Расул Асаевич.
Финалист-лауреат савга Москва каласында, караша айынынъ 10-ншы куьнинде Халклар бирлесуьвининъ куьнине багысланган шарада шатлыклы аьлде тапшырылаяк.
Суьвретте: Расул Шугаиповка савга тапшырылув мезгили.