Дагестан Республикасынынъ Аькимбасы Сергей Меликов белгилегенлей, республикада, шет эллер халклары ара аты белгили Джелал-эд-Дин Коркмасов шынтылайын Дагестан Республикасын туьзген, регионнынъ баьри халкларын бирлестирип. Сонынъ акында айтты ол уллы патшалык аьрекетшисине Махачкалада эстелик ашылув ман байланыслы оьзгерисли шарада.
Сергей Меликов Коркмасов йогары билимли, ети тиллерди билген аьдем болганын эм Дагестаннынъ аьлиги япсарларын токтастырганын белгиледи.
Регион етекшисининъ белгилеви мен, Коркмасовтынъ басшылыгы астында Дагестан уьшин негизли проектлер яшавга шыгарылган:
— республикадынъ бас каласы Махачкалага коьширилген;
— Октябрь революциясы атындагы Татавыл курылган;
— «Дагнефть» предприятиеси курылган;
— тенъиз порты оьрлендирилген;
— савлык саклав эм билимлендируьв тармаклары кепленген.
«Мен бек оьктеммен: бу болжалда биз бу уллы аьдем, бизим баьримизди бирлестиретаган Дагестан Республикасын туьзген белгили патшалык аьрекетшисининъ атын оьмирлетемиз», – деди регион етекшиси.
Онынъ белгилеви мен, халклар ара аты белгили эм йогары билимлиги болганга карамастан, политиктинъ уллылыгынынъ оьлшемлиги – онынъ халк уьшин эткен аян ислери.
«Патшалык аьрекетшисининъ аян уллылыгы онынъ тек йогары ис орынларда куллык этуьви мен тувыл, оьз халкынынъ онъайлыгына эткен аян ислери мен оьлшенеди, – деди Сергей Меликов.