Аьр бир аьдемнинъ яшавында аьскерлер сырасында куллык этуьв дайымларга йигерликтинъ, эркликтинъ, аьдилликтинъ заманы болып калады. Сонъында мунда алынган сулып керекпей болмайды, боьтен де кыйынлы аьллерде. Аджибай Исламов буьгуьнлерде Россия Савытлы Куьшлерининъ сырасында эр борышын толтырады. Яс Дагестан Республикасынынъ Ногай районынынъ Терекли-Мектеб авылында тувып-оьскен. Аьскерлер сырасына Аджибай 2024-нши йылдынъ карагыс айында алынган. Баслап ол Москва каласында куллыгын баслады, сонъында Украина ман япсарга йиберилди. Сол куьннен алып аьскершилер йигерлик пен элимиздинъ кызыксынувларын коршалайдылар. Аджибай Исламовка «За участие в специальной военной операции» деген медаль тапшырылган. Солай ок гвардия рядовойы Аджибай Мурзабий увылы Исламов Россия Федерациясынынъ патшалык япсарларын саклав бойынша эр борышын яваплылык пан толтырганы уьшин аьскерлер боьлигининъ етекшилевиннен Сый грамотасы ман савгаланган.
Эр борышын толтырув заманы ишинде Аджибай Исламов оьзин билимли, бажарымлы, намыслы аьскерши этип коьрсеткен. Соьйтип онынъ акында командирлери, йолдаслары айтадылар, яс сый-абырай казанган, касиети бойынша йигерли, оьзинтутып болатаган аьскерши, кыйынлы аьлде тез эм дурыс карар алып болады.
Аджибай. Шынты ногай ат.
Аьлиги заманда сондай атлар сийрек. Аджибай Исламов оьзининъ уьйкен атайынынъ атын юритеди. Атайы Уллы Аталык согысына 1943-нши йыл Куьнбатар авылыннан кеткен, Берлин каласына дейим етип, уьйге енъуьв мен кайткан. Согыс ветераны Аджибай Исламовтынъ (яткан ери ярык болсын) аты Россия халкынынъ йылязбасына алтын арыплар ман язылган. Уьйкен атайынынъ баьтирлиги Аджибайдынъ эсинде дайымларга коьрим болып калган.
Оьзининъ атасы Мурзабий Енали увылы Исламов (оькининшке, ол арамызда йок) 1991-92-нши йылларда Молдова эм Приднестровье арасында болган согысувда катнаскан, сол йылларда ол аьскерлер сырасында куллык этеяткан болган.
Тагы да бир коьрим бар Аджибайда – онынъ нагашакасы Аджигайтар Ильяс увылы Биякаев, СВО еринде ян берген ердесимиз. Ога тек 31 яс эди, аьли де яс болган, ювыкларына тирев болып, аьлейи мен бирге саьбийлерин оьстирип турса не болады экен. Оькинишке, арамыздан тайып кетти. Аджигайтардынъ аьвлетлери аьли де кишкей – уьйкенине бес яс, кишкейи янъыларда уьш ясына толды. Былтыр сары тамбыз айында Аджигайтар Биякаев Россия Савытлы куьшлери мен контракт туьзген
эм СВО ерине йолланган. Уьш айдан сонъ Донецк областининъ Новоргодовка поселогын босатувда ян берген. Бир йыл узагында ердесимиз сес-хабарсыз йойытылган деп белгиленген, янъыларда оны тавып, тувган ерине аькелип, коьмгенлер. Боьлик командири Аджигайтар Биякаев «За отвагу» медали мен (оьлгеннен сонъ) савгаланган. Бизим ясларымыз баскалар тынышлы аспан астында яшасын деп яс янларын бередилер. Аджибай Исламовка онынъ аьелининъ баьтирлери — алаллыктынъ, йигитликтинъ коьрими. Тезден Аджибай тувган ерине кайтып келеек, уьйде оны кардаш-тувганлары куьтедилер.
Йоллары дайым ашык болсын деп тилек саламыз.
Г.Бекмуратова, ДР ат казанган маданият куллыкшысы.
Суьвретлерде: согыс ветераны А.Исламов; СВО катнасувшысы А.Биякаев; аьскерши А.Исламов.
