Бизим ясларымыз, тек туьнегуьнлерде орамда ойнап юрген кеделер, аьскерши кийимин кийип, Россия Савытлы куьшлерининъ сырасына куллык этпеге кетедилер. Армия йигерликтинъ, дослыктынъ, эркликтинъ кепленетаган ери болып калмай, аьр бир яста патриотизм, Аталыкка суьйим сезимлерин тувдырады.
Кыйынлы заманда оьзининъ эр борышын толтырды бизим ердесимиз Альберт Тахир увылы Аджиков. Ол Терекли-Мектеб авылында тувып-оьскен, сонъында анасы
эм аьптеси мен Махачкала каласына коьшкен. Сол каладан аьскерлер сырасына былтыр куьзде алынды.
Аьскерши Подмосковьеде Александр Невский атындагы мотострелковый полкта куллык этип баслаган, сонъында оны йолдаслары ман бирге Белгород областине
коьширгенлер. Бизим аьскершилер элимиздинъ япсарларын саклаганлар. Кашан да, аьр заманда да тыныклык болмайтаган эди, ама яслар керек заманда йигитлерше
яман явга явап беретаган эдилер.
Тетеси Тамара Муталлаповна унык кызы Лиана ман Альбертке баратаган эдилер, азык-туьлик, таьтлиликлер, йылы кийим аькететаган болган. «Баьри зат та аьруьв, куллыгымызды этемиз». Соьйтип язатаган болган Альберт уьйине. Кайтип кыйын болса да, аьскерши уьйдегилерге бир куьн де билдирмеген.
Альберт аьлиги заманда уьйге кайтып келген. Аьскерлер сырасында куллык эткен заманда рядовой Альберт Аджиков Белгород япсарларында согыс борышларын
толтырувда коьрсеткен йигитлиги уьшин боьлик командованиесиннен Сый грамоталарга тийисли болган. Янъыларда шынты аьскершиге «Участнику специальной
военной операции» деген медаль тапшырылган. Биз шекленмеймиз, ясларымыз Россиядынъ патшалык япсарларын саклавда оьзлерининъ ийги деген эр кисиге тийисли касиетлерин коьрсеткенлер. Олар – уллы Россиядынъ данъклы увыллары.
Альберт Аджиковтынъ кардаштувганлары, тетеси, анасы Майсарат Эдильхан кызы увылы аман эсен кайтып келгенине суьйинип турадылар. Альберт полиция куллыкшысы болмага ниетленеди. Сол юреги мен сайлаган кесписи ога савлай яшавына маьнели болсын. Биз ердесимиз бен оьктемсиймиз эм ога келеекте коьп уьстинликлер йораймыз.
Гульфира Бекмуратова.
Суьвретте: А.Аджиков