«Дагестан» «Этномедиахолдингта «Шоьл тавысы» республикалык газетасынынъ редакциясында янъыларда согыс спецоперациясынынъ катнасувшысы, бу куьнлерде
кыска болжаллы тыншаювга уьйине келген ЮсупАли Нургишиев эм Украина ман Курск областининъ япсарында кызмет кылувын оьткен Рафаэль Межитов пан йолыгыс озды.
Олар ман бирге редакцияга Терекли-Мектеб авыл аькимбасы Марат Кулунчаков та шакырылды. «Шоьл тавысы» газетасынынъ бас редакторы Эльмира Кожаева, йолыгысты ашаятып, редакция коллективин конаклар ман таныстырды эм Марат Избуллаевич янъыларда СВО озып турган ерге бизим йигитлерге гуманитарлык юк
элтеп келгенин айтты.
Юсуп-Али Нургишиев 2023-нши йыл РФ Коршалав министерствосы ман контракт туьзип, согыс спецоперациясы озып турган ерге кеткен. Ол элининъ кызыксынувларын коршаламага кетеек ойы бар экенин баслап биревге де билдирмеген, тек тувра кетеекте ювыклары ман ниети мен боьлискен. Онынъ соьзлери мен, согыслар болган, Элине кыйынлык келген йылларда явга карсы турув – кайсы эр кисидинъ де борышы. СВО еринде Юсуп-Али Мурат-Алиевич уьйкен эм кишкей коьликлер айдайды, боекомплектлер эм аьскершилерди алдышылыкка еткереди.
– Кайсы исте де баслап кыйын болады, биринши айлар бизге де тыныш тувыл эди, аьли болса биз коьп затка уьйрендик. Биз билемиз, кайсы кыйын аьллерге калсак та, оьзимизди саклап болармыз, азык, сув табармыз. Бизим арамызда контракт бойынша куллык этетаганлар коьп, толы болмаган мобилизация бойынша шакыртылганлар йок. Бизи мен бирге етекшилер де, дембиге йолыктырылганлар да, соны ман бирге туьрли миллетли инсанлар, Россиядынъ туьрли муьйислериннен келип, явга карсы турадылар. Олар баьриси де бир аьелдей, бир атадан эм анадан тувган агали-инилидей болып, бир-бирин сакламага, куткармага шалысып,
борышлар толтырадылар.
Оькинишке, сонынъ акында мен элимиздинъ калаларында тынышлы аспаннынъ астында яшаганлар акында айтып болмайман, – деди Юсуп-Али Нургишиев.
Ол редакция куллыкшылары берген СВО катнасувшыларынынъ ян-аьскер коьнъили, ерли яшавшылар ман байланыслы болган эм баска соравларына яваплады.
Йолыгыс барысында Марат Кулунчаков «Неравнодушные сердца» волонтерлар куьбининъ уьйкен куьш салувы эм организациялар ман яшавшылар катнасувы ман йыйналган гуманитарлык югин СВО озып турган ерге элтегени акында хабарлады.
– Бу куьнлерде де, Уллы Аталык согысынынъ йылларындагындай болып, тыл аьскерди коьтергишлейди, халк дайым да йигитлеримизге гуманитарлык юк йыйнап йибереди. Янъыларда да «Неравнодушные сердца» волонтерлар куьбининъ аьрекети мен азыклар, кийимлер йыйналды.
Гуманитарлык югин алып бараяткан аьсерде, туьрли авылларда йолдынъ шетинде аьдемлер уьйкен дорбалар ман турганын коьрдик. Олар Ногай районыннан согыс спецоперациясы озып турган ерге йигитлеримизге гуманитарлык юк пен коьлик шыкканын эситип келгенлер. Аьр ким енъуьвге оьз уьлисин коспага, бизим коршалавшыларды коьтергишлемеге, оларга керекли болган затлар йибермеге аваслыгы ман келгени юрекке етпей, оьктемситпей болмайды.
Бир кере бизим ердесимиз, СВО катнасувшысы агашлар аькетпеге келген эди, онынъ коьлигине халк йыйган затлар сыймай, ога тагы да кайтып келмеге туьскен.
Аьдемлердинъ кыйынлык алдында биргелесуьвин белгилемеге суьемен, – деди Терекли-Мектеб авыл аькимбасы.
Марат Кулунчаков бизим Аталык коршалавшыларына дайым да коьмек эм коьтергишлев керегин белгиледи. Онынъ соьзлери мен, не шаклы гуманитарлык юк йиберилсе де, артыкшылык этпеек. Блиндажлар курылатаган агаш тез ширийди, кийим мен азыклар дайым да керек.
Соны ман бирге авыл етекшиси СВО катнасувшыларынынъ яшавы, турган ери, оьзи коьзи мен коьрген затлар акында айтты, сол баьри де бизге кызыклы эди.
– Мен азыклар болган дорбаларды берген мезгилде, олардынъ биревининъ ишиннен ойыншык ерге туьсти. Оны мен касымдагы орыс кедеге берип, онынъ балалары йибергендей этип эсапламага болаягын айттым. Ол эндиги сол ойыншыктан айырылмаягын билдирди. Оьзек те, ойыншыкты бала йиберген, сол кишкей бала да ак ниетли исте катнасып, енъуьвге уьлисин коспага суьйгени юрек сезимлерин козгамай болмады, – деп бардырды оьз соьзин Марат Избуллаевич. ясы СВО катнасувшыларына кайдай коьмек
Ол Терекли-Мектеб авыл администраци- этетаганы акында да айтып озды, сол коьмек – ол турак уьй салмага берилетаган ер эм СВО катнасувшыларын, олардынъ аьеллерин коьтергишлев.
– СВО катнасувшыларынынъ аьр бириси, олардынъ савгалары болса да, болмаса да
– баьтир. Сонынъ уьшин мен олардынъ аьр бирисине коьмек этпеге шалысаман. Закон бойынша бир коьтергишлевлер тек савгалары болганларга тийисли, мен савгасы болмаса да, коьмекке тийисли деп язаман, – деди ол.
Шара бойынша биз уьйкен оьктемлик пен янъыларда аьскерден кайткан эм эр борышын Украина ман Курск областининъ япсарында оьткен Рафаэль Межитовка карадык.
Ол яп-яс, а коькирегинде савгалар бар – «Военный медбрат». «За помощь в бою», «За образцовое выполнение воинского долга». Рафаэль Артурович япсардагы куллыгы, онда коьзи мен коьрген кавыфлыклар, кайтип керекли ерге еткенлери акында айтты.
Оны Курск областине келген экинши куьн ок та, медпунктка йибередилер. Кайсы ерде де ак халатлылардынъ иси сыйлы эм керекли, а сондай кыйынлы, такыйка сайын яшав сынавга салынган заманларда олардынъ исининъ сыйы коьп кереге артады. Соны ман бирге Рафаэль бизге ясы уьйкенлер ясларды кайтип аяйтаганы, оларды сакламага шалысатаганы акында да боьлисти.
Юсуп-Али Нургишиев те олар кыйынлы ерге ясларды йибермегенлери, олардынъ орынына оьзлери барганы акында айтты. Бу куьн де сол сезилмей болмады, ол Рафаэльге ясуьйкен аьдем кимик карап, маслагатын да берди.
Йолыгыс бек йылы аьлде оьтти. «Шоьл тавысы» республикалык газетасынынъ редакциясы бизим баьтирлер мен тез-тез йолыгыслар уйгынлайды, гуманитарлык юк
йыйнавда катнасады.
Нурият Кожаева, РФ Журналистлер союзынынъ агзасы.
Суьвретте: йолыгыстан коьринис.