Янъыларда Ногай районынынъ Терекли-Мектеб авылында ис борышларын толтырувда эм терроризм мен куьресуьвде ян берген иш ислер органлар куллыкшыларына, солай ок СВО катнасувшыларын колтыклавга багысланып, 50 ясларыннан озган ис ветеранлары ара минифутбол бойынша 10-ншы турнир болып озды. Турнирде баьриси алты командалар ортакшылык эттилер: Ногай районыннан — Терекли-Мектеб авылы, онынъ совхоз Ленин атындагы микрорайоны, Нариман, Кунбатар, Карагас эм Тарумов районыннан – Новодмитриевка авылы.
Шарады уйгынлавда белсенли ортакшылады Терекли-Мектеб авыл администрациясы аькимбасы Марат Кулунчаков пан бирге.
Турнирди озгарувдынъ мырады: ясларда гражданлыкты, патриотизмди, оьз Аталыгына, халкына алаллык эм суьйим сезимлерин тербиялав, савлыкты беркитуьв эм ийги яшав кебин кеплев.
Турнир йогары дережеде оьтти, катнасувшыларды да, каравшыларды да ийги сезимлерге бийлетип эм футбол спортынынъ ветеранлары ара дослыкты эм бирликти беркитуьв мен яс несилге ийги коьрим коьрсетип.
Ярыслар сырагылары бойынша турнир енъуьвшиси Куьнбатар авыл командасы болды, 2-нши орынга Терекли-Мектеб авылынынъ Ленин атындагы микрорайоны тийисли этилинди, 3-нши орынды Терекли-Мектеб авылы бийледи. Солай ок энъ ийги футболшылар да белгилендилер: олар – И.Янполов (турнирдинъ ийги ойнавшысы), Р.Байманбетов (ийги нападающий), Р.Манапов (ийги полузащитник), А.Атангулов (ийги вратарь), З.Закиев (ийги защитник).
Баьри енъуьвшилер эм призерлар «село ТереклиМектеб» администрациясынынъ кубоклары, медальлери эм грамоталары ман савгаландылар.