Казан айынынъ ызгы куьнлеринде Дагестан Республикасында Халклар ара III Каспийский цифровой форум оьтти. Мунда технологиялардынъ келеектегисин ойласувга элимиздинъ эм Каспий касындагы туьрли патшалыкларыннан 1200-ден артык специалистлер йыйналдылар. Форумды Дагестан Аькимбасы Сергей Меликов ашты. Онынъ айтувы ман, регионымыз коьп заманнан бери маданиятлардынъ эм цивилизацияларынынъ косылатаган ери болады, аьлиги заманда Дагестан – Каспий
эллерининъ арасында цифровой коьпир.
– Биз Каспий патшалыкларды бу сорав бойынша бирлестирмеге керекпиз, олардынъ кайбириси сулыбы ман бай, сол сулыпты баскалар да кулланмага боладылар, – деди Дагестан басшысы.
Коьплеген маьнели соравлар каралды шарада – халклар ара транспорт «СыртКубыла» коридорынынъ цифровизациясы, «ясыл» энергетикадынъ оьрленуьви,
киберугрозалар ман куьресуьв эм сондай баска. Форум барысында тоьгерек столлар, дисскуссиялар, власть органларынынъ аьрекетинде сотовый байланыслардынъ
операторларынынъ билдируьвлерин кулланув бойынша семинарлар озгарылды.
Айырым эс регионнынъ цифровой министерствосы эм МТС арасында макулласув документине кол басувга берилди. Соны ман бирге Каспий тоьгерегиндеги патшалыкларда маркетплейслердинъ оьрленуьви форум катнасувшылары ман ойласылды. Коьп планлар салынды ортак соравлары бойынша. Эндиги йыл форум катнасувшыларынынъ географиясын оьстирмеге деген ой айтылды.
– Соны ман байланыста Россия цифровой оьрленуьв министерствосына шакырув этермиз, неге десе Каспий эллерининъ тек бесеви мен куллыкты юритпеге кыйынлы.
Халклар ара транспорт «Сырт-Кубыла» коридорынынъ оьрленуьвине баска эллер де косылса экен. Бу коридор ман байланыслы баска эллерди де шакырармыз деп
ниет этемиз, – деп айтты оьз соьйлевинде Дагестан Республикасынынъ цифровой оьрленуьв министерствосынынъ етекшиси Юрий Гамзатов.
Юрий Гамзатов.
Бизим хабаршы.