Россияда йыл сайын 4-нши ноябрьде белгиленетаган байрам – Халк бирлигининъ куьниннен сонъ Россия Президенти Владимир Путин сонда ок 2026- ншы йылды Халк Бирлигининъ Йылы эсабында белгиленееги акында билдирди. Бу карар муннан алдынгы эки баславлардан сонъ – Аьел йылы эм Аталыкты Коршалавшы йылы эсабында оьткерилип, кабыл этилинип алынды.
Келеектеги йыл Халк Бирлигининъ йылы эсабында озгарылаягы акында билдирилгени коьпмиллетли Россия элинде миллет бирлигининъ эм макулласувлыгынынъ маьнелигин белгилейди. Россиядынъ миллетлик стратегиясынынъ бас мыратларынынъ бириси элимиздинъ молшылыгын туьзетаган туьрли халклар эм этнический куьплери ара бирликти канагатлав болады.
Маьнелиги сол: миллет маданиятларды эм тиллерди тек саклав тувыл, аьдеттеги анъ-акыл эм эдаплык баалыкларды сыйлап, армаган оьрлендируьв керек.
Миллет бирлиги – ол кавыфсызлык, суверенитет эм правовой патшалыктынъ негизи. Ол солай ок шет эллер ягыннан кавыфлыктан коршаланув уьшин сенимлик болады. 2026-ншы йылы Халк Бирлигининъ йылы деп билдирилгени Россия гражданлары, солай ок халклар ара сообществосына миллет бирлиги элдинъ оьрленуьвининъ бас приоритетлери экенин эске салув болады. Геополитикалык авырлыклар эм тыс эллер ягыннан этилинетаган зыянлыклар аьллеринде ямагаттынъ
бирлесуьви боьтен де актуальли болады. Шет эллер ягыннан алдынгысы орын таппаган зыянлыклардан тура россия ямагаты мукаят та бирлести. Бу биргелесуьв «сплочение вокруг флага», «общественный консенсус» деген соьз биригуьвлеринде коьринеди. Бу соьз биригуьвлери куьн аьлиндеги коьнъилликти эм ямагат ой-токтасты коьрсетеди.
Коьпмиллетлик темасын коьтеруьв политикалык куьн аьлинде россия суверенитетин эм патшалыгын саклав уьшин бек маьнели экенин белгилейди. Халк
Бирлигининъ йылы Аьел йылынынъ эм Аталыкты Коршалавшы йылынынъ логикалык бардырылувы болаяк. Ол зат властьтинъ ишки онъайлыгы эм макулласув ман байланыслы соравларга ызлы-ызыннан эс карататаганды шайытлайды. 2026-ншы йыл Россия халклар Бирлигининъ йылы эсабында озгарылаягы тек ишки бирликти беркитуьв белгиси болып калмай, миллет кызыксынувлар контекстинде бу темадынъ маьнелигин де белгилейди. Бу карар туьрли этнический куьплерди бирлестируьвге эм татымлыкта яшав суьрмеге аьллер туьзуьвге каратылган.
Сол зат, оьз шерети мен, аьлиги енъил тувыл уьйкен оьлшемли авырлыклар орын тапкан заманларда элимиздинъ армаган оьрленуьвининъ негизи эсабында аьжетсизлеек.
Эльмира Кожаева,
«Шоьл тавысы» республикалык газетасынынъ бас редакторы.
