Дагестанда, Ногай район еринде ерлестирилип, куватлыгы 60 МВт болган янъы СЭС (новая солнечная электростанция) курув ман байланыслы проект яшавга шыгарылып басланган. ДР Оькимети мен коьтергишленген эм «Хевел» компаниясы ман яшавга шыгарылатаган бу проект – регионнынъ энергетикалык инфраструктурасынынъ берк оьрленуьв йолында сезимли абыт.
Подрядлык организациялар (олардынъ арасында ерли компаниялар да бар) баьри керекли материаллардынъ заман-заманы ман еткеруьвин канагатлайдылар. Ол зат, бу курылыстынъ шалт бардырылувын канагатлап калмай, янъы ис орынларды туьзуьв мен ерли экономикады коьтергишлейди. Бар, оьзек те, экономикалык эм социаллык пайдалыгы да.
Бу электростанциясын салувга киритилген инвестициялар 5,4 млрд. маьнет акша эсабында бааланады. Проект регионнынъ энерготармагын беркитип калмай, 21 дайымлык ис орынлар, солай ок курылыс болжалында 100 кесек заманлы позициялар туьзеек. Онынъ Ногай районы уьшин боьтен де уьйкен маьнелиги бар: сонынъ аркасы ман ерли яшавшылардынъ яшав дережеси сезимли ийгиленеек. Солай ок янъы станциядынъ куллык этуьви мен йыл сайын 40 миллион маьнет акшадай эсапта налог амаллары туьспеге каралады. Бу амаллар, социаллык инфраструктурасынынъ оьрленуьвине кулланылып, яшавшылардынъ яшав сапатлыгын ийгилендиреек.
Ногай районында яшавга киритилип басланган проект регионнынъ тек энергетикалык бойсынмаслыгын беркитип калмай, куьн коьзининъ энергиясын кулланып болув
бажарымлыгы ман Россиядынъ баска ерлери уьшин уьлги эсабында болаяк. Табият-ава шартларынынъ уьйкен оьлшемли туьрленуьв эм энергиядынъ берк булакларына коьшуьвдинъ кереклиги аьллеринде ондай баславлар боьтен де актуальли болады.
Соны ман, Ногай район еринде куватлыгы болган янъы СЭС (солнечная электростанция) монтажы – ол тек курылыс проекти тувыл, а Дагестаннынъ берк эм экологиялык таза келеектегисине маьнели абыт. Ол ерли экономикасынынъ оьрленуьвине янъы эплер ашады, ис орынлар туьзеди эм, тек регион уьшин тувыл, савлай элимиз уьшин приоритет эсабында болатаган энергетика тармагынынъ янъыша оьрленуьвине уьйкен себеплигин тийгистеди.
Эльмира Кожаева, «Шоьл тавысы» республикалык газетасынынъ бас редакторы.
