Дагестанда биринши кере Сырт Кавказ аксакалларынынъ, «Сила предков» деп аталып, Уллы Енъуьвдинъ 80 йыллыгына эм Аталык Коршалавшысы йылына багысланып, форумы болып озды. Форумнынъ бас оьзгериси – Сырт Кавказ аксакалларынынъ Курылтайы. Онынъ куллыгында ДР-нынъ Миллет политика эм дин ислери аькимбасынынъ борышларын кесек заманга толтырувшы, Россия Баьтири Темирлан Абуталимов, солай ок СКФО
эм ЮФО субъектлериннен делегациялар ортакшылык эттилер: олар – уьйкенлер несиллерининъ, илми эм эксперт сообществоларынынъ сыйлы ваькиллери, белгили ямагат эм дин, коммерциялык тувыл организациялар аьрекетшилери.
Форум исинде Ногай район администрациясындагы Ямагат палатасынынъ председатели Эльмурза Саитов, Аксакаллар советининъ председатели
Шатемир Мунгишиев, Иш Ислер эм ыхтыяр саклав органларынынъ ветеранлар Советининъ председатели Акманбет Сангишиев, районнынъ Чернобыльшилер Союзынынъ председатели Руслан Кунтувганов катнастылар.
Съездти аша берип, регионнынъ Миннац аькимбасы Сырт Кавказда оьмирлер бойы эсли аьдемлерге дайым да уьйкен сый этилип келетаганын белгиледи. Сол ийги аьдетти аьлиги несил де алып барады. «ДР Миллет политика эм дин ислери бойынша министерствосы Дагестан Аксакаллар совети мен биргелес аьрекет этуьвге уьйкен эс каратады. Республикада миллетлер эм конфессиялар ара макулласувды беркитуьвге, аьдеттеги анъ-акыл баалыкларды саклавга эм оьрлендируьвге каратылган биргелес шаралар озгарылады, сонынъ ишинде – ясларды янъылыслар этуьвден саклавга себеплигин тийгистетаган олар ман озгарылатаган йолыгыслар.
Неонацизмнинъ, экстремизмнинъ эм терроризмнинъ профилактика соравларына айырым эс каратылады», – деп косты Темирлан Абуталимов.
Регионлардынъ толтырувшы власть органлары ман биргелес куллык юритилуьвдинъ маьнелигин Курылтайдынъ баска катнасувшылары да белгиледилер.