ДР-нынъ Ногай районынынъ Терекли-Мектеб авылында шоьл ерин ясылландырув бойынша уьйкен оьлшемли субботник болып оьтти. Ол республика етекшиси Сергей Меликовтынъ тапшырмасы бойынша озгарылган. ДР-нынъ Табиат ресурслар эм экология министерствосынынъ прессслужбасы билдиргенлей, экологиялык акциясында министр Ратмир Расулов, Дагестан Халк Йыйынынынъ депутаты Даитбек Сайпов, Ногай район етекшиси Джамалутдин Эсиргепов, Ногай район депутатлар Собраниесининъ етекшиси Алибек менласанов, Орыс георафиялык ямагатынынъ ваькиллери эм ерли активистлер ортакшылык эттилер.
Шара барысында уьш юзден артык яс тереклер шашылды, сонынъ ишинде – платан, павлоний, акация, ак терек (тополь), куьйриш (ясень) эм талтерек (ива). Акция ерли предпринимательлердинъ, айтпага, Али Муртазалиевтинъ (ол шашувга яс тереклер эм керекли алатлар берген) белсенли колтыклавы ман оьтти.
Ратмир Расуловтынъ белгилеви мен, бу проект яшавшылар авылларын ясылландырув бойынша озгарылаяк коьп шаралардынъ эм Дагестан Республикада ял алув янъы ясыл зоналар туьзуьвдинъ басы экенине сенеди. Шара уйгынлавшылары регионнынъ берк оьрленуьвин кеплевге эм Дагестаннынъ аьлемет табиатын саклавга себеплигин тийгистетаган сондай проектлерде катнасувга ямагатты эм яслар организацияларын бавлавдынъ уьйкен маьнелигин белгиледилер.