ДР Ямагат палатасынынъ агзасы, район Хатын-кызлар советининъ председатели Асият Манкаева Дагестан Аькимбасы Сергей Меликов республика яшавшылары ман озгарган «Тувра эфирди» «Шоьл тавысы» республикалык газетасынынъ редакциясында журналистлер мен бирге карады. Ол власть эм яшавшылар аьллесуьви
тек буьгуьнги куллык болып калмай, танъла да эм келеекте де юритилеек уллы ис экенин белгиледи.
– Биз Дагестан Аькимбасы Сергей Меликов республика яшавшылары ман озгарган «Тувра эфирди» уьйкен эс этип карадык. Мунда регион яшавшыларын навасызландырган туьрли соравлар коьтерилди.
«Тувра эфир» бойынша Сергей Алимович Дагестан Республикасында озган Уллы Енъуьвдинъ 80 йыллыгы эм Аталыкты Коршалавшы йылынынъ сырагыларын
келтирди, сол бизим ямагатлыкты бирлестируьв эм Уллы Аталык согысынынъ ветеранларынынъ эстелигине эм СВО катнасувшыларына сый этуьв болганын да белгиледи. Уьйкен маьне СВО катнасувшыларынынъ эм олардынъ аьеллерин, СВО барысында йигитше ян берген аьскершилердинъ аналарын коьтергишлевге берилди. Ана куьнининъ алдында аналарды коьтергишлев акында айтылганы эм «Тувра эфир де» сол байрамнынъ алдында озганы кувандырмай болмады.
Дагестан Аькимбасынынъ етекшилиги астында СВО катнасувшыларын эм олардынъ аьеллерин коьтергишлевге каратылган ис регионымызда куьн сайын юритиледи.
СВО озып турган ерге гуманитарлык юклер йиберуьв иси уйгынланады, турак уьй салмага ерлер бериледи эм баска коьтергишлевлер толтырылады. Соьйтип бизим
республикадан СВО-га 25 мынъ тоннадан артык гуманитарлык юк йиберилген.
Ногай районында да бу куьнлерде район администрациясынынъ, волонтерлар эм белсен ямагатшылар етекшилиги астында СВО катнасувшыларын коьтергишлевге
каратылган туьрли акциялар озгарыладылар, айтпага, аьскершилерге посылка, хат, согыс спецоперация катнасувшыларга аналардан посылка эм сондай баскалар. Районымыздынъ яшавшылары бизим Эл коршалавшы-ердеслеримизге гуманитарлык юклер элтеп те кетедилер.
Биз баьримиз де Енъуьвди куьтемиз. Йигитлеримиз аман-эсен уьйлерине кайтсын деп тилек тилеймиз.
Нурият Кожаева.