Уьш саьат бойы Дагестан Аькимбасы Сергей Меликов республика яшавшылары ман хабарлады. Сол заман ишинде ол, яшавдынъ туьрли тармаклары ман байланыслы кыркка ювык соравларына яваплап, власть органларынынъ етекшилерине тийисли буйырыкларын берди. Яшавшылар ман ашык кенъесуьвди Дагестан Аькимбасы бесинши кере юритип келеди.
Республика яшавшылары савлай регион уьшин актуальли туьрли маьселелери акында соравларын, айтпага, ЖКХ, газификация, электроэнергия ман канагатлав, йоллардынъ, ямагат коьлик аьллери акында, экономикадынъ оьрленуьви, билимлендируьв эм спорт бойынша соравларын бердилер. Айырым эс согыс спецоперация темасына, айтпага, аьскершилеримиздинъ коьтергишлевине де каратылды. Солай болып, регион етекшиси тувра линиядынъ барысында Дагестанда янъы эстелик куьни – СВО катнасувшыларынынъ эстелигининъ куьни белгиленееги акында да билдирди. Бу соравлардынъ республикамыз, сонынъ ишинде, районымыз уьшин де, гражданлардынъ яшав сапатлыгына оьз себеплигин тийдируьвинде маьнеси уьйкен.
Тувра линия барысында согыс хабаршысы Омар Магомедов пан кенъесуьв де маьнели орынды алды. Журналист согыс хабаршысынынъ статусы акында соравды
коьтере келип, «согыс журналисти» деген аты берилуьви акында федераллык законы алынувы ман байланыста амалын карамага яде регион бойынша коьтергишлев амалларын аьзирлемеге деген ойы ман боьлисти. Республика Аькимбасы сол маьселе акында билмегени акында билдирди эм оьз орынбасарына, ювык заман
ишинде сол сорав бойынша керекли документлерин аьзирлемеге, буйырык берди. Дагестан етекшиси согыс хабаршыларын оьз яшавларын аямайтаган согыс
разведчик йигитлериндей санайтаганын да айтып белгиледи.
Ол журналистлер толтыратаган аьрекети уьшин разылыгын билдирди эм олардынъ исин толысынша коьтергишлевин канагатламага буйырык берди.
Тувра линия барысында берилген баьри буйырыклар да Дагестан Аькимбасы Сергей Меликовтынъ тергеви астында толтырылаягына соьз йок. Республика яшавшылары болса оьз ягыннан олардынъ аьр кайсы маьселелери де эситилип, заманы ман шешилип, яшавга шыгарылаягына сенимин йоймайдылар.
Г.Нурдинова.
