Ногай адабиятынынъ белгили классиги, уллы йыравы, шаири Шал-Кийиз Тиленши улы XV оьмирде 1420-ншы йылда тувып оьмир суьрген.
Уьстимиздеги йыл ишинде биз белгили йыравдынъ 605 йыллык мерекесин белгилеймиз. Уллы шаирдинъ яратувшылыгы ногай адабиятында тил шеберлиги, соьз усталыгы, бийик зейинлиги эм эш биревге де усамаслыгы ман айырым орынды алады. Онынъ оьлимсиз асарлары оьмирлер оьтип, бизим заманга дейим де еткен эм буьгуьнлерге келисли болып, оьз маьнелигин йойытпай келеди.
Янъыларда уьлке танув музейинде сол ногай адабиятында айырым орынды тутып келген шаирдинъ сыйлы мерекесине багысланган билимлендируьв йолыгысында мектеб окувшылары, С.Батыров атындагы саният мектебининъ тербияланувшылары, китапхана куллыкшылары конакта болып,
зейинли соьз устасынынъ бай яратувшылыгы, онынъ асарлары ман таныспага амаллары болды. Уьлке танув музейининъ эм Ногай район орталык китапхана куллыкшылары, айтпага, библиограф Айгуль Батырова, китапханадынъ канагатлав боьлигининъ етекшиси Беризат Бегалиевадынъ биргелес уйгынлавлары ман «Заманды бойсындырган йырав» деген ногай халкынынъ белгили уллы шаири ШалКийиз Тиленши улынынъ 605 йыллык мерекесине багысланган шарады йылы коьнъилде эм дослык аьлде озгардылар.
Шарады район орталык китапханадынъ библиографы Айгуль Батырова ашты эм юритти. Китапхана куллыкшысы, шарады аша келип, йыйылганларды XV юзйыллыкта оьмир суьрген уллы ногай шаири Шал-Кийиз Тиленши улынынъ яшав йолы, онынъ оьлимсиз яратувшылыгы акында хабарлап озды.
Шарада А-Х.Джанибеков атындагы орта мектебининъ 9-ншы «г» классынынъ окувшылары Радима Такаева, Ваида Османова, Хадижа Елманбетова, айтпага, «Яхшыдынъ яхшылыгы сол болар», «Япырагы ясыл ала байтерек», «Коьп ишинде бир яхшы» деген Шал Кийиз Тиленши улынынъ терен
философиялык маьнели ятлавларын йогары сезимде окып, йыйылганлардынъ эсин караттылар. Солай болып, шарада Ралина Махмудовадынъ етекшилиги мен Терекли-Мектебтинъ С.Батыров атындагы саният мектебининъ яс домбырашылардан туьзилген балалар уьшин «Юлдызлар» уьлгили ансамблининъ тизиминде А-Х.Джанибеков атындагы мектебининъ окувшылары Султан Селиев, Альбина Курманова, Амира Шамавова, Нариман авыл орта мектебининъ окувшылары Кантемир Тенгизов, Сурия Тангаева бурынгы саз алаты домбырада белгили ногай йырлавшы, оьнерли композитор Арсланбек Султанбековтынъ «Домбырам», ДР Композиторлар союзынынъ агзасы, Дагестан Республикасынынъ халк артисти Яхъя Кудайбердиевтинъ «Авылыма» деген йырларына анъларын оьнерли ойнап эситтирдилер. Сол куьн уллы шаир Шал-Кийиз Тиленши улынынъ 605 йыллык мерекесине багысланган аьр бир шара катнасувшыларынынъ халк йыравынынъ оьлимсиз оьнерлиги, аьлемет яратувшылыгы акында билим карзыналарын байытпага амаллары болды.
Г.Нурдинова.
Суьвретте: шарадан коьринис.