Йигитлик эм кайратлык Элимиздинъ коршалавшыларынынъ айырылгысыз сапатлары боладылар. «Яшавда дайым йигитликке орын бар» деген белгили орыс язувшысы Максим Горький. Сол соьзлер буьгуьнлерде де оьз маьнелигин йоймайдылар. Согыс спецоперациядынъ басланганына
мине уьш йылдан артык болады.
Сол заман ишинде аьскершилеримизге коьп сынавлар оьтпеге туьсти: оькинишке, кайбиревлер йолдасларын йойдылар, баскалары яраландылар, уьшиншилери корсалавга туьстилер. Каты урысларга да карамай, олар алдыга берк барадылар, бир-бирин ядыралардан саклап, тынышлы яшавшыларды коршалайдылар. Олардынъ коьплери яс аркаларга коьримли уьлги болып, йигитлиги, эрклиги уьшин туьрли савгаларына тийисли да боладылар. Энъ кыйын шакларда йигерлик эм тиресуьвлик коьрсетип, оьз элин коршалап калмай, оьсип келеятырган аркады да оьзлерининъ уьлгисин ызламага коьнъиллендиредилер.
Йигитлик баскалар уьшин янын аямайтаган, тек коркынышсыз аьдемлер мен этиледи. Соьйтип, согыс спецоперация юрген ерде аьскершилеримиз неонацистлердинъ намартлыгыннан ерлерди босатып, энъ баалы болган, оьз яс янларын аямай, курман этедилер. Биз олардынъ аьр бирисин атлы-атлары ман билмеге тийислимиз. Меним буьгуьнги хабарымнынъ бас геройы бизим ердесимиз Джанибек Абдулакимович Мусаев.
Джанибек Аблулакимович Дагестан Республикасынынъ Кизляр районынынъ Нововладимирское авылында 1989-ншы йылда Абдулаким Шемшетович эм орыс тил эм адабиятыннан окытувшысы Салимат Шабановна Мусаевлердинъ татым аьелинде тувып оьскен. Ерли мектебти тамамлаган сонъ, Джанибек коьлик айдавшы кесписине окыган.
Эл алдында эр борышын яс Алтай крайынынъ Бийск каласында оьтти. Аьскерден сонъ, ол Элимиздинъ бас каласы – Москвага йолланады.
Онда ол курылыс компаниясына туьсип куллык этеди. Ис еринде аьрекет этип келуьви мен оьз етекшилеви эм ис йолдаслары арасында уьйкен сый эм абырай ман пайдаланып келди. Уьйде тунгыш бала болган саялы, Джанибек оьзининь кишкей иниси, карындасы эм ата-анасы алдында яваплыгын сезип, оларга оьз колыннан келген ярдамын этпеге шалысты.
Элимиз уьстинде коркыныш тувганда, Аталыгымыздынъ йигерли увыллары тасада карап турмадылар. Согыс спецоперация басланганда, олар элининъ межелерин коршаламага асыктылар. 2022-нши йылдынъ кырк кийик айынынъ 24-нши куьнинде мобилизация бойынша Джанибек Мусаев те согыс спецоперация юрген ерге йол алды. Аьскер сырасында алган сулыбы эм шыныгувы ога согыс урысларында бек керектилер. Шешен Республикасында касындагы йолдаслары ман аьзирлик коьрип, ол СВО юрген ерге йиберилди. Буьгуьнлерде каты урыслар барган ерде Джанибек санинструктор эсабында яралы аьскершилерге биринши медициналык ярдамын этип келуьви мен, алдына салынган аьскер борышларын толтырувда
белсенли катнасып келеди.
Коьрсеткен йигитлиги, йигерлиги эм неонацистлерден ерлерди босатканы уьшин, Запорожье еринде службасын яваплы толтыратаганы уьшин, Джанибек Абдулакимович «За отвагу», «За боевые отличия», «Участник специальной военной операции» деген медальлери мен савгаланган.
СВО катнасувшысынынъ анасы, Салимат Шабановна, Элининъ шынты коршалавшысын тербиялаганы уьшин оьктемлигин ясырмайды. «Мен, оьз увылымды куватлы, йигит, нызамлы эм яваплы аьдем этип оьстиргеним уьшин бек оьктемсиймен. Аьскершилеримизге нацистлерди енъип, явдынъ
алдын бувып, уьйлерине аманэсен кайтаякларына бек сенемен», – дейди оьз увылы акында Салимат Шабановна. Биз аьр бир аьскершилеримиз
бен оьктемсиймиз. Олар бизим шынты патриотлары, сенимли коршалавшылары боладылар. Йигит аьскершилеримиз биз олар ман бирге экенимизди, олардынъ службасынынъ аьр бир такыйкасы коьптен саклаган Енъуьвди ювык этееги акында билмеге тийислилер. Олардынъ йигитлиги эм кайратлы куьресуьвлери савлайымызга да уьлги. Аьскершилеримиздинъ коьрсеткен баьтирликлери Элин суьймеге, оны коршаламага аьзир болувга коьнъиллендирип, несиллер эсинде дайымга сакланар. Согыс майданда оларды Кудайымыз коршаласын, аьр кими де аьеллерине аман-эсен
кайтсынлар.
Гульмира Нурдинова,
РФ Журналистлер союзынынъ агзасы.
Суьвретте: Джанибек Мусаев.
