Биз аьр заманда да Савытлы Куьшлерининъ сырасында оьз эр борышын толтырган яслардынъ акында язамыз, олар ман оьктемсиймиз. Меним тенълерим афган согысынынъ катнасувшылары болдылар. Биз де ясларды армияга йолга салатаган эдик, олардынъ биревлери дайымларга сол ят ерлерде калганлар. Буьгуьнлерде аьскершилеримиз таза аспаннынъ астында куллыгын бардырадылар, болса да олар йигерлик пен Россия Федерациясынынъ япсарларын коршалайдылар бу кыйынлы заманларда.
Ногай районынынъ Куьнбатар авылынынъ яшавшысы Рафаэль Артур увылы Межитов янъыларда эр борышын толтырып, уьйге кайтып келди. Ол Кантемиров атындагы Кызыл Байраклы Ленин орденининъ танковый дивизиясында 13-нши гвардия полкында куллыгын бардырган.
Боьлик командирлерининъ айтувы ман, Рафаэль Межитов оьзин ийги аьскерши этип коьрсеткен – намыслы, тербиялы, куллык кызыксынувларын биринши орынга салып, ислейди, карар алувда кайсы зат маьнели экенин биледи. Коллективте тийисли сый-абырай казанган. Бу касиетлер шынты эр кисиге келиседилер.
Рафаэль Межитов Кисловодск каласында медициналык колледжин битирген, «медицинский брат» кесписин байырлаган. Бу кеспиди сайлаганлар оьз куллыгында уьйкен яваплылык тутадылар. Аьдемнинъ яшавыннан йогары эм баа бир зат та болмас. Эр борышын толтырмага кеткенше, Рафаэль Россия МЧС Сырт-Кавказ специальли санаторно-реабилитационлык орталыгында ислеген. Оьз кеспилик касиетлерин ол армияда куллык эткен заманда да кулланган. Рафаэль Межитовтынъ омыравында «Военный медик. За помощь в бою», «За образцовое исполнение воинского долга» деген медальлер яркырайдылар.
Увылы эр борышын толтырмага кеткенде, ата-ана сагынадылар, кыйланадылар. Эгер ол оьз куллыгын ийги толтырса, оьктемсийдилер. Киши сержант Рафаэль Межитовка боьлик етекшилеви атыннан белгили танковый полкынынъ сырасында эр борышын йигерли толтырганы уьшин разылык хат тапшырылган. Сол
хатта булай язылган: «Сен бизим уллы Аталыгымыз – Россиядынъ куьшин, куватлыгын арттырган уьшин тийислисинше сый-абырай казангансынъ. Сенинъ исинъ аьр дайым туьз болсын, акылынъ – дурыс, колынъ – авыр, юрегинъ – таза». Кайдай ийги соьзлер. Сондай разылык хат Рафаэльдинъ ата-анасы Артур
Русланбек увылы эм Альбина Темирбек кызы Межитовлар алдылар. Оьктемсийди агасы ман Темирбек Межитов, аьлиги заманда ол 10-ншы класста окыйды, келеекте Аталыгымызды коршаламага ниетленеди. Кишкей карындаслары Камила эм Лейла аданасларын армиядан куьтип турдылар, суьйинишке, олардынъ коршалавшысы уьйде, ювыкларынынъ касында.
Бизим яслар таза аспан астында куллыгын бардырып, уьйге аман-эсен кайтып келсинлер. Мен Рафаэль Межитовка келеектеги яшавында уьстинликлер йорайман. Кайсы ерде ислесе де, кайсы йоллар ман юрсе де, мен сенимлик пен айтпага боламан, сондай йигерли, таза ниетли ясымыз керексингенге оьз коьмегин этер, баска биревдинъ кайгысын боьлисер эм сайлаган кесписине алал болар.
Гульфира Бекмуратова.
Суьвретте: Р.Межитов.
