Аьр бир халктынъ тарихинде, коьрсеткен ислери бойынша Элине шет-кырыйсыз суьйим, кайратлык, йигерлик белгиси болып калган, йигитлери бар. Буьгуьнлерде Элимиз уьстинде коркынышлык тувганда, боьтен де, биз Аталыгымыздынъ парахатлыгын эм тынышлыгын коршалавга турган йигитлеримизди эсимизге алып, уьйкен сый этпеге тийислимиз.
Буьгуьн мен сондай йигитлердинъ бириси Байажи Руслан увылы Кувандыков акында хабарламага суьемен. Онынъ балалык шагында эткен мырады, туьрли яшав сынавларын оьтип, эр борышын толтырувда шыныгып, шынты юрек шакырувга айланды.
Байажи Руслан увылы Кизляр районынынъ Сангиши авылында Дельманбет эм Загидат Азимовлардынъ аьелинде тувып оьскен. Яс куллык этуьвди эм
яваплылыкты бала шагыннан сезип келди. Мектебти тамамлап, аьскер сырасына эр борышын толтырмага йолланады. Аьскердеги куьндегилик яшавда
Байажидинъ касиети кепленди, сулыбы байыды, Аталыкка кызмет этуьв онынъ шынты юрек шакырувы болды.
Эр борышын толтырганнан сонъ, оны бакты алыс Сургут каласына аькелди, сонда яс «Сургутнефтегаз» компаниясында аьрекет этип баслады. Болса
да, бала шактан офицер боламан деген асыл мырады ога парахатлык бермеди. Коьп ойланып турмай, Байажидинъ алган токтасы онынъ савлай яшавын
туьрлендирди. Коьп кетпей, ол Мурманск областининъ Спутник поселогына йол алды. 2016-ншы йылдан алып 2023-нши йылга дейим тенъиз пехотадынъ айырым бригадасында боьлик командири болып, алдына салынган борышын яваплы толтырып келди.
Согыс спецоперация барысында ДНР еринде болган урысларда ортакшылык этти. Бай сулып, службады оьтуьвде алган шыныгувы, йогары кеспилиги, куллыксуьерлиги, оьз исине яваплы каравы ога аьскершилик йолында баьри кыйынлыкларын да оьтпеге ярдамластылар. Ердесимиз каты урыслардынъ
бирисинде алдына салынган согыс борышларын толтырувда сол аягына авыр яраланады. Ама сол зат та онынъ коьнъилин тоьмен этпеди. Госпитальде эмленип шыкканнан сонъ, Байажи Руслан увылы Элин коршалавга аьзирлигин коьрсетип, йолдаслары ман бир сырага турды. 2023-нши йылдан алып ол оьз службасын Крым еринде Симферополь каласында 5-нши бригадасынынъ байланыс управлениесининъ сырасында бардырды. Мунда ол киши лейтенант болып, боьлик етекшиси эсабында службасын бардырды.
2024-нши йылда Байажи Руслан увылы оьз етекшилеви мен СанктПетербург каласындагы Совет Союзынынъ Маршалы С.М.Буденный атындагы байланыс бойынша аьскершилик академиясынынъ офицерлер курсына йибериледи. Буьгуьнлерде согыс оьзгерислерининъ ветераны Байажи Кувандыков Херсон еринде Элининъ межелерин коршалавда белсенли катнасады. Алдына салынган борышларын йогары оьлшемде толтырганы, согыс урысларында коьрсеткен йигитлиги, коркынышсызлыгы уьшин ердесимиз патшалык савгасы – Жуков медалине тийисли этилди.
Оьз Эли уьшин йигитлерше куьресетаган ердеслеримизге суьйикли аьели, кардаш-тувганлары, ювыклары сенимли тирев эм куьш-куват алувынынъ шынты булагы болады. Ога аьели мен озгарган аьр бир аьлемет шагы бек баалы, аявлы. Уьйинде ердесимизди суьйикли аьели, кардаш-тувганлары аьсиретли саклайдылар.
Аьели мен озгарган заманын Байажи айырым баалайды. Онынъ суьйикли аьвлетлерининъ, дирек болган кардашювыкларынынъ суьйими, аьсиретли саклавы ердесимизге алдына салынган борышларын етимисли толтырмага сенимлик береди.
Биз йигитлеримизди атлы-атлары ман билмеге эм оларга сый этпеге тийислимиз, олар коьримли уьлгиси мен бизди, келеек несилин коьнъиллендирип келедилер.
Г.Нурдинова.
Суьвретте: Байажи Кувандыков.
