Кесписин юрегининъ шакырувы ман сайлаган, сол ис пен энъ де ярык мыратларын бала заманыннан алып байланыстырган аьдем оны сав оьмири бойы бардырады, сол исте уьйкен уьстинликлерге етиседи, етекшилиги астындагы аьдемлерди де, басшылаган организациясын да йигерли кепте алдыга аькетип, энъ де ийгилер сырасына киргистеди. Ол исин бардырган тармагында тек оьзи уьйкен пайда аькелип калмай, ювык аьдемлерине де, балаларына да ийги коьрим болып, сол аьрекетке оьзлерин багысламага даьвлендиреди. Соьйтип сондай аьдемлер врачлар, окытувшылар, юристлер эм баска кеспилер династияларын туьзедилер.
ДР ат казанган врачы, Ногай орталык больницасынынъ бас врачы, медицинага яшавынынъ 35 йылын багыслап келген Фаризат Межитова, оьз аьелининъ врачлар династиясынынъ басында турады. Сол династия аьли де яс, онда тек эки несил врачлар, болса да ол келеектегиде коьп йыллар узагына йолын бардыраягына сенимлик уьйкен. Династияларды тек куьшли аьдемлер туьзбеге болады, неге десе ол бир кеспиди сайлаган ювык аьдемлердинъ бири бирининъ алдында уьйкен яваплылык. А медицина династиясын туьзуьв – ол тек ювыклар алдында тувыл, коьмекти куьткен мынълаган аьдемлер алдында яваплылык.
Фаризат Межитова Дагестан патшалык медицина институтынынъ «лечебное дело» боьлигин 1989-ншы йыл уьстинликли тамамлап, ис аьрекетин Ногай район поликлиникасында участковый терапевт болыпбаслаган. Ол бир йылдан терапевт боьлигининъ заведующийи болады, сонъ уьш йыл узагына Нефтекум район больницасынынъ участковый терапевти болып ислейди.
2001-2011-нши йылларда Ногай район терапевти эсабында терапевт службасын басшылайды, сонъ эмлев иси бойынша бас врачтынъ орынбасарынынъ куллыгын юритеди. 2017-нши йылдан алып ДР савлык саклав министрининъ буйырыгы ман Ногай район больницасынынъ бас врачы болып ислейди. Сол яваплы иске Фаризат Янибековна билимли, аьзир специалист эсабында киреди, ол участковый терапевттен алып бас
врачынынъ орынбасары болып ислеген кезеклерде йыйнаган бай сулыбына таянады.
Фаризат Янибековна Ногай орталык больницасын етекшилеген йылларда коьп ийги туьрленислер болган: савлайын ЦРБ-дынъ материаллык негизи янъыртылган, поликлиникада, район орталык больницадынъ инфекция эм терапия боьликлеринде, Червленные Буруны авыл
участковый больницасында, Куьнбатар авыл врачебный амбулаториясында капиталлык ярастырув этилинген, Эдиге авылында фельдшеракушер пункты салынган, стандартларга коьре заманга келисли медицина оборудованиеси Нариман, Куьнбатар авылларындагы фельдшеракушер пуктларына алынган, баска
авыллардагы аьдемлерди тергемеге болган флюорограф берилген, коллцентр ашылган. ДР Савлык саклав министерствосынынъ коьтергишлеви мен коьп янъы коьликлер алынган, тезлик ярдам этуьв иси ийгиленген. Сакат аьдемлерге, аьли кайсы авылга да барып, медицина яктан коьмек этпеге амал бар. Червленные
буруны авылынынъ фермаларына етпеге Патриот коьлик те аьзир.
– Бизим районда гемодиализде керексинген 10 аьдем бар. Аьли олар Кизляр каласына бармай, бизде ярдам алмага боладылар. Солай ок компьютерлик томография аркалы да бизде коьп авырувлар аянламага болады. Авыр маразларды эртеректен аянлап, биз авырыганларды баска якларга терен тергелуьвге йиберемиз, сонынъ авырувлыдынъ эмленуьвинде себеби уьйкен.
Эки УЗИ аппаратлары да бизде янъыртылган. Врачларга ислемеге баьри ийги аьллер туьзбеге шалысамыз,уьйкен коьликлерден алып компьютерлерге дейим толы кепте ислейди.
Онъайлы аьллер туьзбей, куллыкшылардан минсиз исти куьтип болмайсынъ. Энъ де баалы – аьдемлердинъ ден савлыгына яваплы болган медицина куллыкшылары исине йогары маьне бермеге, яваплылы карамага тийислилер», – дейди Ногай район орталык больницасынынъ бас врачы. Онынъ соьзлери меним эсиме аьлим, врач Ф.Гааздынъ айтканын туьсирдилер: «Медицина – илмилердинъ патшасы, неге десе ден савлык дуныядагы баьри уллы эм ярасык
затка керекли». «Наьсипке аькелген тувра йол наьсипли болмага аваслыкта тувыл. Ол аьдемлерди наьсипли этуьвде. Сонынъ уьшин олар керексингенди билмеге, олардынъ акында каьр шекпеге тийисли. Аьдемлерге ис пен эм маслагат пан ярдам этеятып, куллыктан коркпага ярамайды, бир соьз бен, оларды суьймеге керек, не шаклы сол суьйимди савкатласанъ, сол кадер ол куьшли бола береди». Соьйтип Фаризат Янибековна оьз иси мен коьрсетеди яшаган ерининъ аьдемлерине суьйимин, йогары соьзлерсиз шалысувында эм каьр шегуьвинде. Ол куллыгына сондай карасы ман эм етекшиге келисли болган касиетлери мен ис
йолдаслары сырасында уьйкен сыйабырай казанган.
Янъыларда Ногай орталык больницасына РФ Савлыксаклав министерствосынынъ «Национальный медицинский исследовательский центр терапии и профилактической медицины» Федераллык бюджет учреждениесиннен келген тергев, онынъ исине йогары белги берген.
Фаризат Янибековнадынъ соьзлери мен, ондай тергевге бир айдынъ ишинде аьзирленип болмайсынъ, эгер йыллар узагына тийисли кепте куллык бардырылмаган болса.
Ногай орталык больницасына уьйкен сеним мен ДР савлык саклав министерствосы Москва каласындагы медицина орталыгынынъ ваькиллерин мунда йиберген, неге десе бизде оларга коьрсетпеге коьп ийги зат бар болган. Савлай коллектив пен биз республикамыздынъ эм ДР Министерствосынынъ сенимин
акладык», – дейди Фаризат Янибековна.
Ногай орталык больницасынынъ бас врачы Фаризат Межитовадынъ йогары кеспи усталыгын, ДР савлык саклавынынъ оьрленуьвине уьйкен уьлис косканын коьплеген Сый грамоталар шайытлайдылар, айтпага: ДР Савлык саклав министерствосыннан Сый грамоталар эм Разылыклар, Юкпалы авырувларды тергев астында саклав бойынша миллет ассоциация специалистлерининъ Разылыгы, ДР Аькимбасыннан Сый грамота, РФ Савлык саклав министерствосынынъ, туьрли йылларда куллык эткен Ногай район етекшилериннен Сый грамоталар эм коьп баска савгалар. Янъыларда Фаризат Янибековна Дагестан Республикалык медицина куллыкшыларынынъ Профсоюз организациясынынъ коьп йыллык намыслы иси уьшин Сый грамотасы ман эм РФ Савлык саклав
куллыкшыларынынъ кеспи союзыннан «Фронтка коьмек уьшин» Разылык тапшырылды.
Фаризат Янибековнадынъ куллыгындагы уьстинликлери мен бирге уьйкен йолына аькеткен кишкей сокпагын белгилемей, яшавында сосындай аьдем болувында уьйкен орынды туткан ата-анасынынъ акында айтпасам, дурыс болмас. Фаризат Межитова Янибек эм Келдихан Шинмурзаевлердинъ аьелинде тунгыш бала болып тувган. Янибек Йолакаевич – зоотехник, Келдихан Керимовна эсап эм физика дерисининъ окытувшысы болып коьп йыллар ислегенлер. Олар районымызда интеллигенциядынъ биринши ваькиллери болып, яшаган ерининъ онъайлыгына куьш салганлар, балаларынынъ – уьш кыз эм ялгыз увылынынъ ийги тербиясына да бек уьйкен маьне бергенлер. Кишкей заманында Фаризат музыка мектебинде анъ алатларда усташа ойнаган, ога келеекте оьз
бактысын анъ ман байланыстырмага окытувшылары маслагат эткенлер, ама онынъ юрегинде врач кесписине суьйими куьннен-куьнге беркиген, келеекте оьзин тек врач этип коьрген. Ол оьзининъ уьш синълисине де, эки кызына да врач болмага маслагат берген. Соьйтип бу куьнлерде олар баьриси де, оннан оьзгелей, олардынъ балалары да медицинада оьзлерин тапканлар. Фаризат Янибековнадынъ уьйкен кызы Динара Умарбековна Наткина –медицина илмилерининъ кандидаты, Москвада кардиолог, терапевт эм функционаллык диагностика врачынынъ исин толтырады, экинши кызы Диана Телемишева республикалык клиникалык стоматологиялык больницасында врач-стоматолог болып ислейди. Олардынъ аьр бириси, ак ниетли иске оьзининъ алаллыгын коьрсетип, уьстинликлерге етискенлер.
Бу куьнлерде ювык, аьзиз аьдемлерининъ эм уьйкен ис коллективи мен бирге оьзининъ 60 йыллык мерекесин белгилеятып, Фаризат Межитова Яратувшылыгымызга, бактысына наьсипли аьелде тувып, оьзи де татым, дайым йылы аьллер бийлеген аьел курганына, яшав йолы ман оны ман бирге ян йолдасы Умарбек Асанович барганына, юрегинде оьктемлик эм куваныш тувдырган эки кызын бирге оьстиргенлерине, ис коллективиндеги катнасларга
уьйкен разылыгын юрегинде саклавы ман боьлиседи. Аьелине каратылган уьйкен суьйим мен бирге ол оьз халкына эм тувган ерине сезими акында айтады.
– Мен аьр дайым да оьз юрегимде, янымда Ногай орталык больницасын эм ногай халкымды сеземен. Халкым оьрленгенин, билимли ясларымыз ногайымнынъ келеектегисин онъайлы эткенин суьемен. Ногай район орталык больницасынынъ энъ де ийгилер сырасында белгиленгенине ис коллективим уьшин суьйинемен, – дейди Фаризат Янибековна.
Нурият Кожаева.
Суьвретте: Ф.Межитова.
