Кырды, ерди ак камышынъ ман каплап,
Япалак кар, шоьллигиме хош келдинъ!
Ак ниет пен халк аьсирет саклаган,
Янъы йылды сен оьзинъ мен аькелдинъ.
Тереклерден куьни етип саргайып,
Кар ман бирге япырак туьсе ак ерге,
Яз капталы шоьллигимнинъ бозарып,
Ак коьйлегинъ аьзир сенинъ киймеге.
Бутакларын тереклердинъ сен орап,
Наьзик белли ак келиндей ясарттынъ.
Ак шалынъ ман каплап шоьлдинъ кенъ тоьсин,
Сылув юзли карлыгызга усаттынъ.
Мен келдим деп эсиклерге сен кагып,
Ак сокпакты аьр бир уьйге ясадынъ.
Кыл йиплерден ак оьрнеклер савкатлап,
Юреклерге суьйим, сеним ястадынъ.
Янъы йылым, ак карынъ ман хош келдинъ.
Ногай шоьлге тоьгип нур эм берекет!
Ап-ак кардай мыратка, ой-ниетке
Ногайымнынъ йолын дайым ашык эт.

Гульмира Нурдинова.