Бу куьнлерде болса, биз уьйкен оьктемлик пен Украина еринде баратаган согыс спецоперациясында катнасып, йигитлик коьрсетип, федераллык дережели савгаларга тийисли болган йигитлеримиз акында айтамыз. Савгага тийисли болмаган болсалар да, аьр бириси бизге баалы. Олар сонда кетуьви мен сыйга, оьктемликке тийисли боладылар. Алдынларда оьткен урысларда аталарымыздынъ коьрсеткен эрлиги эм баьтирлиги бу куьнлерде увылларына, уныкларына ийги коьрим болады. Солардынъ коьрсеткен йигитликлери негизге салынып тербияланган увыллар аьли оьзлери йигитлерше согысадылар.
Элди коршалав, аьлиги заманда эр кисилердинъ шынты борышы болады: биревлер СВО басланганда, патшалык шакырувы ман, баскалар контрактлы аьрекетти бардырмага кеттилер. Аьр кайсысы да – баьтир, сондай абыт пан олар оьзлерининъ Элине алаллыгын, эр йигитлигин коьрсетедилер.
Оьктемсиймиз аьр бир СВО еринде аьрекет бардыратаган йигит пен. Элбетте, олар сыйлавга тийисли. Коьнъилимиз бек туьнъиледи, эгер олардынъ яс янлары курманлык болса, ама эл арасында калган ийги атларын оьмирлерге саклавга ант этемиз. Бизим калемимиздинъ астыннан шыгатаган макалалар да
– сога себеп…
Элди коршалавда яс янын берди ердесимиз Эмиль Русланбек увылы Суюндиков та. Онынъ аты калды халкында. Эмиль сабыр касиетли анадынъ, биревдинъ хаьтерине тиймейтаган атадынъ увылы эди. Онынъ бала шагы, яслыгы Ногай районымыздынъ орталыгы Терекли-Мектеб авылында бир кайгысыз оьткен.
Ол ерли А-Х. Джанибеков атындагы мектебинде билим алганнан сонъ, Пятигорск каласындагы савда, технология эм сервис бойынша орта специальли окув ошагында кеспи алады.
«Аьдемге Россия Федерациясынынъ аьскер сырасы – яшав мектеби. Мунда ол оьзине коьп янъылыклар ашады. Яшавдынъ баасын анълап баслайды», – дейдилер ясуьйкенлер, аьскер сыраларында кызмет кылган эр кисилер. «Элди коршалав – меним асыл борышым. Соны толтыра келип, мен тек Элимди, кишкей Аталыгымды саклап калмайман, сонынъ ишинде мен мага яшав берген анамды да саклайман», – деген эди Эмиль-бебемиз аьскер сырасында эр борышын толтырувды баслаган шагында. Сонда Эмиль бир неше коькирек белгиге де тийисли болып, ата-анасына уьйкен сый ман кайткан эди.
Буьгуьнлерде биз СВО еринде «Ногаец» деген шакырувы болган алал увылды, оькинишке, йойдык. Ол уьстимиздеги йылдынъ увыт айыннан алып контрактлы аьрекетти бардыратаган эди. Онынъ ызгы борышы Покровское йорыгында толтырув болды.
Анасы Назира Рамберди кызынынъ билдируьвине коьре, биринши ис борышын Эмиль уьстинликли толтырган эди, тек экиншиси ога сонъгы болды…
Коькек айынынъ ортаншы куьнлери… Эмильдинъ яс юреги урган ызгы куьнлер. Йок, ондай увыллар оьлмейдилер, олар оьзлерининъ яс янларын курманлык этуьви мен Элдинъ ярык келеектегисин туьзедилер, Эмильдей йигитлердинъ кан тамшылары аккан ерлерде аьли де коьп боьригоьзлер оьсерлер, сол
ярасык гуьллер арасында суьйим де тувар, балалар да оьсерлер.
Солар баьриси де, бизим Эр йигитлердинъ етимислери деп тарих бетлери айтар…
Аьли болса, мен юрек сызлавым ман онынъ ата-анасына бассавлыкты йорап, Эмильдей баьтирлеримизге тек еннет капысы кенъ ашылсын деп, Кудайымнан тилек тилеймен.
Г.Сагиндикова.
Суьвретте: Эмиль Суюндиков.
