Ногай район администрациясында 8-нши шакырувдынъ Ногай район Депутатлар йыйынынынъ 4-нши кезекли сессиясы болып оьтти.
Сессияды ашаятып, Депутатлар йыйынынынъ председатели Алибек Менласанов бу йолгы сессиядынъ бас соравы – келеяткан янъы 2026-ншы йылга эм план кезегиндеги 2027-нши эм 2028-нши йылларга Ногай район бюджетининъ проектин ойласув эм беркитуьв экенин билдирди.
Бу сорав бойынша Ногай район администрациясынынъ финанслар боьлигининъ начальниги Арслан Кусегенов шыгып соьйледи. Онынъ айтувы ман, 2026-ншы йылдынъ район бюджетининъ проектининъ бас параметрлери келимлер бойынша 831 368 434,47 маьнет, сонынъ ишинде авыл поселениелерине берилетаган 27 439 000 маьнетти де эсап этуьв мен, эм шыктажлар бойынша 825 860 434,47 маьнет акша эсабында туьзиледи. Баьриси байыр келимлер саны дотация ман бирге эсап эткенде – 265 700 000 маьнет акша болады. Келеяткан йылдынъ бюджетинде келимлер шыктажлардан артадылар.
Арслан Кусегенов республикалык бюджетиннен 2026- ншы йылга туьспеге каралатаган карыжлар оьлшеми 617 607 652,47 маьнет деп белгиленген яде бу сан келимлердинъ ортак оьлшемининъ 74,9 проценти болатаганын билдирди.
Онынъ соьзлерине коьре, район бойынша байыр келимлер ишиндеги налог келимлери 90,6 процентке етиседи. Финанс боьлигининъ начальниги депутатларды
янъы бюджеттинъ шыктажлары ман да таныстырды. Ол районнынъ янъы бюджетининъ проекти бойынша ога берилген соравларга да яваплады. Депутатлар бюджет проектин ойласкан сонъ, соны кабыл этип алдылар.
Сессиядынъ экинши соравы бойынша район администрациясынынъ архитектура эм ЖКХ боьлигининъ начальниги Алибек Муллаев «Автойол талаплавларына эм йол хозяйствосына муниципаллык тергевлер салув акында положениеди» окыды. Депутатлар быйылдынъ район бюджетине туьрленислер киргисттилер эм 2026-ншы йылга район Депутатлар йыйынынынъ ис планын беркиттилер.
М.Юнусов.