Коьнъилли аьдемлер аьр дайым да бизди оьзине каратадылар, кайсымыз да олар ман катнаспага, ислемеге, бирге заманды озгармага суьемиз. Сондай аьдемлер йогары коьнъилди янындагынада савкатлайдылар, оьз кайратлыгын да коьширедилер демеге болады. Биринши караска, ондай аьдемлер яшавында кыйынлыклар эм маьселелер мен бир де распагандай болады. Ама ол янъылыс ой, аьр биревдинъ яшавында ярык эм авыр куьнлер болады. Сол кыйынды тыныш этуьв де, маьселелерге кайдай карас пан карав да – аьдемнинъ колында.
Меним бу куьнги хабарым – коьнъилли, кайратлы кыскаяклы акында. Ол – Терекли-Мектеб авыл яшавшысы Зульфира Бекишиева. Оны таныганлар, баска
ийги касиетлериннен оьзге, энъ де биринши болып йогары коьнъиллигин, оьзине соны ман каратувын белгилейдилер. Зульфира ман бирге кайсы ис те тез эм тыныш озады, оны ман бирге бир калага кыдырып барсанъ, сол элгезерлик коьп заманга дейим эсинъде турады эм бек кызыклы озады, – дейди онынъ
ювыгы эм бизим ис йолдасымыз.
Зульфира Алимхановна Ленинаулда тувып-оьскен. Мектебти аьруьв белгилерге окып кутарады, ама элимизге кыйынлы сол 90-ншы йылларда ол оьзи суьйген
ерге окымага бармай, Кизляр районындагы Черняевка авылында кеспи училищеде кийим туьгуьвшиге окыйды. Сонъ аьел курып, аьели мен Астрахань каласында яшайды. Яс аьелдинъ бийкеси бу калада савда ман каьр шегеди, оннан Ногай районга кайткан сонъ да, савдалык исин юритеди. Юреги ашык, аьр бирев мен тил тавып болган кыскаяклыдынъ савдасы да бек ийги юреди. Йогарыда белгиленгенлей, коьнъилшен аьдемлердинъ де яшавында кыйынлы заманлар болады, сондай кыйын куьнлер болды Зульфирадынъ яшавында да. Яны куьшли болган кыскаяклы сол заманда да ислемеге, алдыга абыт алмага куьш тапты. Ол, билимин оьстирмеге суьйип, Карашай-Шеркеш педагогикалык университетинде заочно окыды, ама «меним суьйген исим – савда юритуьв» деп, баслаган исин коймады. Зульфира экинши кере аьел курып, яшавын кайтадан туьзди. Руслан Бекишиев ога тек ян йолдас болып калмады, олардынъ суьйген иси де – савда юритуьв, бир эди. Сол заманга келисли янъы туьрленислер болган йылларда ян йолдасы Руслан ман бириншилер сырасында мобильли байланысынынъ буйымларын, сотовый байланыс уьшин тоьлегенлер эм коьп баска тоьлевлер толтырганлар, аьли де олар сол буйымлар бойынша куллык этедилер. Соны ман бирге олардынъ уьйкен болмаган туькенинде ийги савда юреди. Зульфира оьзининъ касиетлери мен бу уьйкен конкуренция заманында да куллыгын артта калмай бардырады.
Ол оьзининъ балаларына да ана суьйимин аямай савкатлайды, оларды билимли болып оьссинлер деп, ян йолдасы ман бирге баьри куьшин салады. Кызы Назира Кисловодск каласындагы медициналык колледжин окып тамамлаган, аьли Волгоград каласындагы оькимет медициналык университетининъ
филиалы Пятигорск каласындагы медико-фармацевтикалык институтында стоматология боьлигинде окыйды. Увылы Чингизхан Пятигорск каласындагы педагогикалык колледжиннен сонъ, Ставрополь оькимет педагогикалык институтынынъ Ессентуки каласындагы филиалында окыйды. Кенжапайлары Алимпаша Кадрия атындагы мектебинде окыйды. Балалары ман бирге Зульфира йиени Темирланга да куьезленеди.
Бу куьнлерде Зульфира Бекишиева ясларга оьзлерининъ куьшлерине сенмеге маслагат этеди, онынъ соьзлери мен, аьдем оьз колыннан келмеге болганды баслап билмеске де болады, бир истен де коркпага ярамайды. Савда ман байланыслы кызыклы эм тыныш болмаган аьрекетте, кыйынлы исте
кыйынлыклар алдында басты ерге туьсирмей, коьнъилли аьлде алдыга карап абытлав керек.
Н.Кожаева.
Суьвретте: З.Бекишиева.
