Аьр бир кеспи керекли эм маьнели, олардынъ кайсысы да аьдемнен туьрли ийги касиетлерди куьтеди. Медицина куллыкшысынынъ кесписи болса, усталык пан бирге аьдемшиликти, шыдамлыкты, танълыкты, эркликти, яваплылыкты куьтеди. Онынъ иси кайдай кыйын болса да, йылдан-йылга медицина тармагын сайлаганлардынъ саны оьсе береди, неге десе аьдемлер касындагына оьз коьмегин этпеге, пайдалы болмага суьедилер. Бу кеспиди коьримли аьдемлерге карап сайлаганлар да боладылар. Биревлер, анасынынъ яде кардаш-ювыгынынъ йолы ман барып, ак халатлыдынъ исин сайлайдылар эм алаллык пан бардырадылар.
Терекли-Мектеб авыл яшавшысы Элина Якубова кишкей заманнан алып оьз мыратларын медицина ман байланыстырган. Онынъ анасы Арувзат медсестра болып ислеген эм аьр дайым да авырыганларга табылып, колыннан келген ярдамын эткен. Соны коьрген кыз, мектебтен сонъ Кисловодск каласындагы 2-нши номерли медколледжинде окыйды эм оьз ис аьрекетин 2009- ншы йыл Ногай орталык больницасынынъ поликлиникасында баслайды. Яс хатын авырыганды эмлев бойынша врачтынъ язганы ман толтырады, айтпага, заман-заманы ман оларга дарман береди, ийне урады.
Куллык аз тувыл, аьдемлер де коьп келеди, Элина Сраждиновна болса олардынъ аьр кайсысы ман да сабыр соьйлейди. Хатын борышларын толтырувга бек яваплылы карайды, онынъ куллыгын юритуьвге сукланып карап тургынъ да келеди, уста коллары ман тамырды да тез табады. Сонынъ акында
ога барган авырыганлар айтадылар. «Биз медсестралар колларында эмленемиз, бир-бирде алгасап, оларга савбол да айтпага мутамыз.
Мен поликлиникага тыншаюв куьнинде келген заман да болды, Элина Якубова уьйине кайтпай мени карап туры эди, мен ога бек разыман», – дейди район орталыгынынъ яшавшысы.
Ийги иси уьшин Элина Якубова район бойынша эм Ногай орталык больницасынынъ администрацияларыннан Сый грамоталар ман савгаланган. Савлык саклав тармагында аьр бир куллыкшыдынъ иси маьнели, олардынъ аьр кайсысынынъ иси мен байланыслы аьдемнинъ эмленуьвининъ сырагысы. Баьрине де
белгили, энъ де йогары кеспи усталыгы болган врачка да, исинде медсестрадынъ коьмеги керек болады. Медсестралардынъ куьндегилик иси врачтынъ коьмегининъ янында коьп коьринмеске де болады, ама ол бек керекли эм разылыкка тийисли.
Нурият Кожаева.
Суьвретте: Элина Якубова.