Гульфира Бекмуратова

Янъы йыл алдында согыс спецоперациясында яв ман согысып турган военнослужащийлердинъ аьвлетлерине Орта-Тоьбе эм Карагас авылында янъыйыллык савкатлар тапшырдылар. Бу шарада эки авыллардынъ аькимбаслары Мурат Капашов (Карагас) эм Загир Насыров (Орта-Тоьбе) катнастылар.

Шара Ногай районынынъ администрациясы ман уйгынланды. «Ногайский район» МР аькимбасынынъ орынбасары Рашид Шангереев эм коррупцияга карсы турув бойынша коьмекшиси Руслан Аджиев балаларга таьтли савкатлар бердилер. Рашид Сейпидин увылы саьбийлерге берк ден савлык, окувда уьстинликлер, коьтеринъки коьнъил йорады.

Руслан Аскерхан увылы балаларга баьри мыратлары толганын, баславда уьстинликлер йорады. Ол оьз соьйлевинде Аталыгымыздынъ коршалавшылары – олардынъ аталарына сый эм разылык пан карайтаганын билдирди.

Шатлыкта Карт Бабай эм Карлыгыз балалар ман бирге йырладылар, ятлавлар айттылар. Балалардынъ аналары уйгынлавшыларга саьбийлерге сондай байрам аьзирлегенине разылыгын айттылар. Оьз аталарын узактан карап турган балалардынъ коьнъили сол куьн бек коьтеринъки болды.