Саваплык – ол ак ниетли ис. Кайсы заманларда да аьдемлер кыйын аьлге туьскенлерге ярдам эткенлер. Яшавда саваплыкка аьр дайым да ер табылар. Аьлиги заманда да, коьп аьдемлер тыныш болмаган ислер бойынша куллык этсе де, яхшылык этуьвге, каьр шегуьвге, ярдамласувга заман табадылар.
«Казыят» саваплык фонды осал яшайтаган Ногай районындагы 90 аьелге «Шоьл тавысы» республикалык газетасына язылмага ярдам этти. Белгиленген фонд 90 экземпляр газетасынынъ акшасын тоьледи, эндиги кыйын аьлге туьскен аьеллер 2026- ншы йыл узагына аьр юма сайын ногай тилинде шыгатаган газетасын тегин алып тураяклар. «Шоьл тавысы» республикалык газетасынынъ бас редакторы Эльмира Кожаева «Казыят» саваплык фондынынъ етекшисине Дагестан Республикасында ана тилинде шыгатаган сынъар газетасын коьтергишлегени уьшин разылыгын билдирди.
– Мен савлай коллективимиз атыннан «Казыят» саваплык фондына, онынъ етекшиси Рашид Акказиевке ана тилин таралтувда уьлис косканы эм осал яшайтаган аьеллерге коьмек эткени уьшин уьйкен савбол айтаман. Белгилемеге суьемен, бу олардынъ биринши акциясы тувыл. Олар бир неше йыл узагына газетамызга осал аьлге калган аьеллерди язылув исин уйгынлайдылар, – деди Эльмира Кожаева. Айтып озайык, «Казыят» саваплык фонды яшавшыларды туьрли яклардан коьтергишлейдилер. Фонд кыйын аьлге туьскен аьеллерге азыклар элтейдилер эм Канглы авылында салынаяткан межигитке курылыс
алатлар алмага акша йыйнаганлар.