Россияда 25-нши январьде элимиздинъ энъ де яркын яслардынъ байрамы – Студентлер куьни белгиленеди. Бу куьн окув ошакларында туьрли кызыклы шаралар, конкурслар уйгынланадылар. Коьп йыллардан сонъ, энъ де завыклы студент шагынынъ янга якын эскеруьвлерине сол байрамды белгилев куьни де киреди.
Соны ман бирге мыратлар, ойлар, сенимлер, ойынлар, туьрли оьзгерислер студент йылларын боьтен де мутылгысыз этедилер. Мыратларга толган эм туьрли оьзгерислерге бай студент яшавына бу йыл да абытын алып бардылар районымыздынъ мектеблерининъ выпускниклери. Олардынъ сырасында мектебте окыган заманында да оьз билими, кайратлыгы, белсенлиги мен авыл-элди сукландырганлары, бу куьнлерде де окыяткан йогары окув ошагынынъ эм окытувшыларынынъ оьктеми боладылар.
Соьйтип биз, йигерли кепте, Нариман авыл мектебинде билим алган, аьли Самарадагы патшалык медициналык университетининъ 1-нши курс студенти
Казбек Кусегеновты белгилемеге боламыз.
Казбекке мектебте окувында уьстинликлери уьшин алтын медаль тапшырылган. Яс тек окувына бет берип калмай, туьрли конкурсларда да катнаскан. Ол
«Созвездие открытий» Савлайроссиялык илми-практикалык конференциясынынъ савгасына тийисли болган. «Йыл окувшысы» республикалык конкурсынынъ – финалисти, «Умники и умницы» телевизионлык ойынынынъ – агонисти, «Балалардынъ коьзлери мен» республикалык креативли суьвретлер конкурсынынъ енъуьвшиси болган. Оннан оьзгелей, биология, экология, технология бойынша окувшылар Савлайроссиялык олимпиадасынынъ, мектеб краеведение бойынша республикалык олимпиадасынынъ, «Элимнинъ келеектегиси – меним колларымда» республикалык конкурсынынъ район кезеклерининъ енъуьвшиси болган. Ол «Брейн-ринг» муниципаллык интеллектуальлик ойынынынъ «Энъ де ийги ойнавшысы» деп белгиленген. Биз онынъ мектебте коьрсеткен уьстинликлерининъ бир кесегин белгиледик. Зейинли аьдем, баьри яктан да оьнерли деген соьзлер де Казбекке келисли. Онынъ ятлав окув оьнерине туьрли патриотлык эм байрамларга багысланган шараларда район яшавшылары ман бирге мен де неше де сукланганман.
Бу куьнлерде Казбек Кусегенов Самарадагы патшалык клиникалык медицина университетининъ энъ де ийги студентлерининъ сырасына киреди. Ол
биринши сессиясын тек «5» белгилерге берген. Мектебтеги йылларындай болып, йогары окув ошагында да белсенликти йоймайды. Яс ердесимиз профессор В.Павлов атындагы «Управление качеством и безопасностью медицинской помощи» 19-ншы Савлайроссиялык илмипрактикалык конференциясында катнаскан. Озган йылдынъ 7-нши ноябринде 1941-нши йылдагы энъгимели Согыс парадынынъ 84-нши йыллыгына багысланып Самара каласында Куйбышевтинъ майданында оьткен 15-нши мерекели Эстелик Парадында билим алаяткан университетининъ байрагын алып барувшы эсабында катнаскан.
Казбек Кусегенов – янъы биринши курс студенти, онынъ уьстинликлери аьли де алдыда. Шекленмеймиз, онынъ акында алдышы студент эм айтылган
врач эсабында эситеегимизге.
Казбек Кусегеновты баьри студентлер мен бирге байрам ман кутлап, алган билимлери мен уьстинликли пайдаланып, тувган еримиздинъ онъайлыгына кыйын салувда етимислер казанув ман аьрекет этуьвди йораймыз.
Нурият Кожаева.
Суьвретте: К.Кусегенов.
