«Шоьл тавысы» республикалык газетасынынъ аявлы окувшылары! Биз баьримиз бирге янъы 2026-ншы йылга янъы ойлар, мыратлар эм сенимлер мен абыт алдык. Озган йыл да биз оьз окувшыларымыз бан суьйинишли эм кайгылы хабарлар ман боьлистик: районымыздынъ онъайлыгы уьшин куьш салган ясларды эм ясуьйкенлерди, элимиздинъ туьрли калаларында уьстинликлерге етискен ердеслеримизди белгиледик, туьрли шаралар оьткерилуьви эм коьп баска хабарлар ман боьлистик, авыр болса да, согыс спецоперация еринде яс янларын Эли уьшин берген йигитлер акында да айттык, оьктемлик пен Эл коршалавшыларымыздынъ орденлер эм медальлерге тийисли болганларын яздык.
Редакцияда мерекеши шаирлердинъ яратувшылыгына багысланган ятлав окув, ногай тилди саклавга эм таралтувга каратылган туьрли конкурслар уйгынладык. Сол баьри де бизди окувшылар ман боьтен де ювыкластырады. Коьп куллыклар биргелесте оьтедилер. Йылдынъ сонъында артка карап, сырагылар да келтириледи. 2026-ншы йылдынъ биринши ярым йылына «Шоьл тавысы» республикалык газетасына язылув иси уьстинликли оьтти. Сонынъ уьшин редакциядынъ ис коллективи етекшиси Эльмира Кожаева ман бирге газетамыздынъ окувшыларына разылыгын билдиреди. Аьлиги йогары технологиялар заманында да, газетадан оьзге билдируьв булаклары аз болмаса да, онынъ коьп яшавшылар уьшин суьйимли эм сагынышлы болып калувы канатландырады. Соны ман бирге газетады суьйип куьткен ясуьйкенлер сырасында яслардынъ аз болувы да кайгыртпай болмайды. Газета бетлеринде – халкымыздынъ озганы эм аьлигиси. Озганын билмеген эм сыйламаганнынъ келеектегиси де йок, деп те айтылады.
Разылыгымызды билдиремиз «Ногайский район» МР администрациясынынъ аькимбасы Джамалутдин Эсиргеповка, Кизляр районынынъ аькимбасы
А.Микиров, авыллар аькимбасларына, савлай район организациялар эм учреждениелерине, билимлендируьв эм савлык саклав тармагынынъ куллыкшыларына, соны ман бирге тийисли тыншаювдагы ясуьйкенлерге.
Йыл сайын газетамызга язылувда оьз коьмек колын созып келген ногайлардынъ ямагатлыгы атыннан ярдамын эткен Москва каласындагы «Казыят» саваплык
фондынынъ етекшиси Рашид Акказиевке (ол кыйын аьлге калган 90 аьелди газетага язылув исин уйгынлаган), Россия МИД МГИМО алдышы илми куллыкшысы Ахмет Ярлыкаповка, язувшы, журналист Альберт Тамакаевке, «Росойл» заправка иеси Руслан Бекмуратовка, «Стамбул» туькен иеси Марзиет Асаналиевага, конъысы Кизляр, Бабаюрт, Тарумов районларынынъ яшавшыларына савбол айтамыз. Дагестанда ногай тилинде баспаланатаган сынъар газетасын коьтергишлев киели борышы несилден несилге коьшеегине сенемиз!
Нурият Кожаева.