Россия Президенти Владимир Путин миллетлер ара катнаслары бойынша Советининъ кенъесинде 2026-ншы йылды Россия халклар Бирлигининъ йылы этип билдируьв акында маслагатты яклады. Сондай токтаска келуьв, оьзек те, анъламлы, неге десе Россиядынъ явлары миллетлер эм динлер ара катнасларды аьлиги туьзилген аьллерди авырлатув мыратта савыт-садак эсабында кулланадылар. Эм сога явап – 2026-2030-ншы йылларга патшалык миллет политикасынынъ янъы Стратегиясы. А онынъ биринши абыты – элимиздинъ етекшиси мен 2026-ншы йыл Россия халклар Бирлигининъ йылы деп билдирилгени акында карарды кабыл этип алувы.
Элимиз уьшин бу карардынъ бир де болмагандай маьнелиги бар. Россия – коьпмиллетли патшалык. Онынъ байлыгы тек географиялык кенъликлеринде тувыл, а, бас деп, маданият, тил эм анъ-акыл туьрлилигинде. Элимиз еринде 190-нан артык туьрли халклар эм этнический куьплер яшайдылар. Эм сонынъ уьшин бу абыт тек белги эсабында тувыл, а ортакроссиялык ювык усаслыкты, баьри халклардынъ маданият асабалыгын саклавга, туьрли этнослар эм конфессиялар ара сыйлы аданаслык катнасларды кеплевге каратылып кабыл этилинип алынган карар.
Россия халклар Бирлигининъ йылында, уьйкен оьлшемли ярыкландырув, маданият эм билимлендируьв проектлер яшавга шыгарылып, россиянлылардынъ
ой-карасларында, туьрлиликлерге карамастан, биз – бирликте деген анъламды тереннен-терен тамырластырар. Эм бу туьрлиликлер – эрислесуьвдинъ булагы
тувыл, а бизим Тувган еримиздинъ куьш-куватлыгынынъ негизи. Тереннен сенемен: бу авыр аьллерде миллет эм дин ара катнаслар ман байланыслы кавгаласувларды болдыртпас уьшин бизим ортак куллык юритуьвшидинъ уьйкен маьнелиги бар. Россия халклар Бирлигининъ йылы – тек байрамшылав уьшин
аьрекет этуьв тувыл, бизим аьримизди яваплылыкка шакырув да болады. Боьтен де миллетлер ара бирликти, аьскершилик аданаслыкты эм бирлесуьвлик бизим
баьтирлеримиз — согыс спецоперациясында катнасатаган аьскершилер эм офицерлер коьрсетеди.
Урыслар юритилуьв майданларда олар миллети бойынша боьлинмейдилер – олар россиянлылардай, Аталыгымыздынъ коршалавшыларындай, аданаслардай бирге. Олардынъ йигитлиги, коркынышсызлыгы соны шайытлайды. Эске туьсирейик: ДР аькимбасы Сергей Меликов оьткен йылда «Тувра линия» барысында
Элимиз етекшиси мен келеяткан 2026-ншы йыл Россия халклар Бирлигининъ йылы деп билдирилгени акында соравга берген явабын. «Владимир Владимирович бизге бизим йылды савкатлады. Бизде — энъ коьпмиллетли регион эм республикада аьр йыл – Халклар бирлигининъ йылы, сонынъ уьшин 2026-ншы йылды айырым коьрнекли аьлде, сонынъ ишинде баска регионлардан конакларды шакырув ман, оьткермеге керек, халклар бирлигининъ эм макулласувынынъ уьлгисин коьрсетип», — деп белгиледи Сергей Меликов. Шынтысы ман да, регион етекшиси белгилегенлей, Дагестан Республикасында аьр йыл халклар бирлигининъ йылы, неге десе Дагестан элимиздинъ энъ коьпмиллетли регионы деп белгили. Мунда тил бирликте 120-дан артык миллетлердинъ ваькиллери яшайдылар.
Любовь Уразаева.
