«Баьтирлер Парталары» несиллер эстелигин саклайдылар. Аьр бир йигитлик оьрметленип, эсте сакланмага тийисли. Республикамызда ясларды патриотизм ягыннан тербиялавга каратылган билимлендируьв баславлары белсенли яшавга шыгарылып келеди. Коьплеген мектеблерде «Баьтирлер Партасы» ашылганлар. Мектеб окувшылары согыс спецоперация катнасувшылары ман йолыгыспага амал болатаган «Маьнели зат акында хабарласув» деген тема бойынша тыскы дерислерин озгарувынынъ майданлары болып келедилер.
Баска болып, окувшылар ман «Бав эстелиги» акция бойынша шаралар да озгарыладылар. Мектеблерде согыс спецоперация йигитлерине багысланган коьплеген муьйислери туьзилип, эстелик такталары да салынадылар. Баска болып, «Лица Героев» деген федераллык проекти де яшавга шыгарылып келеди.
Янъыларда Кизляр районынынъ Нововладимирская мектебинде маьнели патриотлык оьзгериси болды, айтпага, билимлендируьв ошагы «Баьтир Партасына» ортакроссиялык проектине косылды.
7-нши класста мектеб выпускниги Биболат Руслан увылы Нургишиевтинъ эстелигине багысланган «Баьтир Партасы» ашылды. Ол 2025-нши йылдынъ курал айынынъ
9-нши куьнинде согыс спецоперация барысында аьскершилик борышын толтырувда оьлгеннен сонъ, Йигитлик орденине тийисли этилген. Шарады тамада вожатыйы, окытувшы Зайнаб Бекмурзаевна Уразлиева эм 7-нши класс етекшиси Мадинат Явгайтаровна Рамазанова юриттилер. Юритуьвшилер ызлы-ызыннан баьтирдинъ мектеб йыллары, онынъ аьскершилик йолы, кайтип яс оьзининъ аьскершилик борышын толтырганы акында хабарлап эситтирдилер. Шара Россия Гимныннан басланды.
«Баьтир Партасынынъ» шатлыклы ашылувында сыйлы конаклар, айтпага, Черняевка авыл администрациясынынъ ваькили Евгений Ахмедович Карабалаев, йигиттинъ
ювыгы, ерли мектеб етекшисининъ тербиялав иси бойынша орынбасары Майсарат Курбанажиевна Сангишиева ортакшылык эттилер. Оьз соьйлевлеринде олар шынты
баьтирлер оьлмейди, йигитлер дайымга халк юрегинде эм эсинде калатаганын белгиледилер. «Баьтир Партасы» – ол неонацизмнен тынышлыкты коршалавда Аталыгы
уьшин янларын курман эткен ердеслерининъ акында эстеликти оьмирлетуьвининъ бир кеби болатаганын да айтып оздылар. «Баьтир Партасын» ашпага Черняевка авыл администрация ваькили Евгений Карабалаевке ыхтыяр берилди. Мектеб окувшылары уьшин сондай партадынъ ашылувы – ол йигитлер бизим эсимизде яшайтаганын эм олардынъ коьрсеткен йигитликлери тарихке дайымга киргени акында эске салув болады.
Партадынъ ашылувы эстеликке суьвретке туьсуьв мен тамамланды. Белгилеп озайык, «Единая Россия» партиясы ман басланган «Баьтир Партасы» деген билимлендируьв проекти окувшыларды йигитлик эм коркынышсызлык коьрсеткен ердеслери мен толысынша таныстырады.
Сондай партада олтырмага, окувда баскаланган эм мектеб яшавында белсенли катнасып келген окувшыларга ыхтыяр бериледи. Сол зат окувшыларда Элимиздинъ тарихине, онынъ аьвелгисине, аьлигисине, баска болып, баьтирлерге эм согыс оьзгерислерининъ катнасувшыларына сый этуьвди тербиялайды. Ол Элимиз, тынышлы коьгимиз, Аталыгымыздынъ келеектегиси уьшин, сол ясларга, олардынъ коьрсеткен йигитликлерине тийисли сый этуьв болады.
Г.Нурдинова.
Суьвретте: шарадан коьринис.