Янъыларда сыйлы ердесимиз, МВД эм согыс оьзгерислерининъ ветераны Зейдулла Курман увылы Аджибайрамов суьйикли аьели, кардаш-тувганлары арасында оьзининъ 60 йыллык мерекесин шатлыклы аьлде хош алды. Зейдулла Курман увылынынъ ис йолы онынъ тувган ери мен, оьз халкы ман тар байланыслы. Аявлы аьели, кайсы баслаган исине де алаллыгы, кардаш-тувганларына, тувган ерине, халкына суьюви ердесимиздинъ яшавын толы, бай эм маьнели этип келеди. Туьрли ис орынларда каьрлеп келуьви мен ол тек уьстинликлерге етисип калмай, халкы арасында сый-абырай казанган аьдемлердинъ бириси де болады.
Асылы ман Зейдулла Курман увылы Ногай районынынъ конаксуьер Кумлы авылында Курман эм Базархан Аджибайрамовлардынъ коьпбалалы аьелинде 1966-ншы
йылдынъ канътар айынынъ 13-нши куьнинде тувыпоьскен. Атасы Курман Ленин атындагы йыныслы койлар оьстируьвши совхозында трактор коьлигин айдап, анасы
Базархан ерли мектебте куллык этип, аьелдеги ети аьвлетлерин аякка тургызып, яшавдынъ тувра йолына онълаганлар. Мектебте окыган йылларында яс оьз тенълери
арасында окувга ымтылыслыгы, шалыскырлыгы, куллыксуьерлиги, йигерли касиети мен баскаланды. 1984-нши йылда Кумлы авыл орта мектебин етимисли тамамлаган сонъ, яс Красноярск каласына аьскер сырасында эр борышын толтырмага йол алды. Аьскер сырасыннан кайткан сонъ, куллыктан бир де коркпаган, Ленин атындагы совхозда туьрли ислеринде аьрекетледи.
Йогары билим алмага деген мырады яшавга айланган куьн де етти. Ол 1987-нши йыл Харьков авылхозяйство институтынынъ механизация эм электрофикация факультетине туьсип, оны етимисли тамамлайды. Юрек шакырувы ман сайлаган кесписин байырлап келген яс ис аьрекетин оьз тувган авылында, колхозда инженер болып баслайды. Эндиги кеспили ястынъ алдында туьрли йоллар, амаллар ашылдылар. Ол йылдан-йылга сулыбын оьстирип, кайсы баслаган исинде де туьрли уьстинликлерге етисип барды. 1994-нши йыл ога бакты Ногай районынынъ иш ислер органлары боьлигинде участковый аьрекетин толтырмага, бара тура подполковник дережесине дейим коьтерилип, Россия МВД-сынынъ Ногай районы бойынша боьлигининъ етекшисининъ орынбасарынынъ ис орынында куллык этпеге де туьсти. Сол ис орыныннан ол 2015-нши йылда тийисли тыншаювга кетеди. Зейдулла Курман увылы тыншаювда болса да, сол йыл ТереклиМектеб авыл аькимбасы болып сайланып, савлай куьшкуватын яшайтаган авылын, онынъ яшавшыларынынъ тоьгерегин оьрлендируьвге, коьрклендируьвге багыслап келди. Сол йыллар ишинде «село Терекли-Мектеб» СП МО Депутатлар авыл Йыйынынынъ депутаты болып та етимисли аьрекетин юритти. 2023-нши йылдан алып 2025-нши йылга дейим ТИК (территориаллык сайлав комиссиясы) председатели болган, оьткен йылдынъ канътар айыннан алып Россия МВД Ногай районы боьлигининъ ветеранлар Советининъ председатели исин де толтырып келеди. Бу уьстимиздеги йылдынъ канътар айыннан алып Зейдулла Курман увылы Дагестан Республикасы бойынша регионаллык ногай миллет маданият автономиясы бойынша ямагат организациядынъ председатели ис аьрекетинде де оьзин сынап баслады. Сол ис аьрекетинде ол оьз халкынынъ туьрли маьселелерин шешуьвде, маьнели соравларга керекли эс беруьвде белсенлик тутып келер деп сенемиз. Коьп йыллар бойы туьрли ис орынларда куллык этуьви, кайсы исин де яваплы толтырувы оьз емисин де бердилер. Айтпага, МВД эм согыс оьзгерислерининъ ветераны ийги ис тамамлары уьшин l, ll, lll дережели ведомстволык, Россия ногайларынынъ ФНКА атыннан «За заслуги перед ногайским народом», КПРФ ЦК Председатели Г.Зюганов атыннан туьрли медальлери, район администрация атыннан туьрли Сый грамоталары ман коьп кере белгиленген.
1992-нши йыл ян косагы Гульшаар Зейнадиновна ман курган татым аьелинде эки сылув кызлары Фаризат эм Медина, кенжапайлары Султан оьсип, тербияланганлар. Уьй бийкеси Гульшаар Ногай район муниципаллык билимлендируьв учреждениелерин канагатлав бойынша етекшиси, бас бухгалтери ис аьрекетин уьстинликли толтырып келеди. Тунгышлары Фаризат Москва каласындагы Пирогов атындагы медакадемия эм ординатурады етимисли тамамлаган. Буьгуьнлерде ян косагы Ярикбай
Шамилевич пен аьел курып, элимиздинъ бас каласында яшайдылар. Фаризат клинико-диагностикалык орталыгында терапевт врачы аьрекетин толтырады.
Баладынъ баласы балдан таьтли дегенлей, Зейдулла Курман увылынынъ эм онынъ ян косагынынъ коьнъилининъ ян тоьрин шешекейдей яйнаган йиен кызы Фатима да коькке дейим коьтерип келеди. Сол тувылма аьдем уьшин наьсип дегенинъ!
Биз де сыйлы ердесимиз Зейдулла Курман увылын оьткен 60 йыллык мерекеси мен кутлай келип, ога берк ден савлык, узак оьмир, аьел онъайлыгын, келеекте де
бийик етимислер коьп болганын йораймыз.
Г.Нурдинова.
Суьвретте: Зейдулла Аджибайрамов.
